चिमुकलीचा हट्ट अन्‌ बोटाला शाई 

बालहट्ट तो बालहट्टच... 

नाशिक : राजहट्ट, स्त्रीहट्ट अन्‌ बालहट्ट म्हटला की तो पुरवावाच लागतो असे नेहमीच बोलले जाते. त्याचीच प्रचिती आज गंगापूर रोडवरील एका मतदान केंद्रात आली. आईसोबत मतदान केंद्रावर आलेल्या चिमुकलीने, तिची आई मतदान करून बाहेर आल्यानंतर तिनेही आईने केले त्याचप्रमाणे तिलाही मतदानाचा हक्क बजवायचा होता. त्यासाठी ती हटूनच बसली. ही बाब मतदान केंद्र निरीक्षकाच्या ध्यानात आली आणि त्यांनी अखेर तिचा मतदानाचा "बालहट्ट' पुरा केला. त्यानंतर मात्र त्या चिमुकलीने आनंदाने हसत हसत मतदान केंद्र सोडले. 

अद्विता गिरी असे या चिमुकलीचे नाव. गंगापूर रोडवरील वाघ गुरुजी शाळेमध्ये विधानसभा निवडणुकीचे मतदान केंद्र होते. आज सायंकाळी पाच वाजेच्या सुमारास अद्विता ही अवघ्या अडीच-तीन वर्षांची चिमुकली तिची आई आणि आजोबांसोबत मतदान केंद्रात आली. आई अन्‌ आजोबांनी मतदानाचा हक्क बजावला आणि ते तिच्यासह बाहेर आले. परंतु अद्विताने तिच्या आईकडे हट्ट धरून बसली. 
हट्ट काय तर, जसे तिच्या आईने बोटाला शाई लावून मतदान यंत्रावर जाऊन मतदान केले; अगदी तसेच तिलाही करू का दिले नाही म्हणून ती रडू लागली. तिच्या आईने आणि आजोबांनी समजून काढत शाळेच्या प्रवेशद्वाराबाहेर आणले. परंतु अद्विता काही ऐकेना. त्याकरीता ती रडूही लागली. यावेळी शाळेच्या प्रवेशद्वाराबाहेर पोलिसांचा फौजफाटयासह मतदान केंद्राचे निरीक्षक होते. 
त्या निरीक्षकाचे चिमुकल्या अद्विताकडे पाहतच होते. त्यांच्या लक्षात तिचा हट्ट आला आणि ते तिच्याजवळ गेले आणि "चल, आपण आईने केले तसेच करू' असे म्हणता, अद्विताच्या चेहरा खुलला. अद्विताने लगेच आईचे बोट सोडले आणि निरीक्षकांचे बोट पकडून मतदान केंद्राच्या दिशेने चालू लागली. त्यांनीही तिचा तो हट्ट पुरविताना, केंद्रात नेऊन तिच्या बोटाला शाई लावली आणि आतून फिरवून आणून परत तिच्या आईकडे सोपविले. तेवढे केल्याने अद्विता कमालीची खूश झाली होती. त्या आनंदातच तिने आई ÷अन्‌ आजोबांसोबत निघून गेली.