Dhule News : तापी पाणीपुरवठा योजनेलाही बळकटी! 3 नवीन पंप दाखल
Dhule News : एकीकडे अक्कलपाडा पाणी योजनेचे काम अंतिम टप्प्यात आले असताना याच योजनेत मंजूर तापी पाणीपुरवठा योजनेच्या दुरुस्तीचे कामही हाती घेण्यात आले आहे. यासाठी २०० एचपी क्षमतेचे तीन पंप बसविण्यात येणार आहेत.
हे नवीन पंप सुकवद पंपिंग स्टेशन व बाभळे जलशुद्धीकरण केंद्रांवर दाखल झाले आहेत. (Tapi water supply scheme strengthened 3 new pumps introduced Dhule News)
अक्कलपाडा पाणीपुरवठा योजना मंजुरीत अस्तित्वातील तापी पाणीपुरवठा योजनेच्या दुरुस्तीसाठी एकूण सात कोटी ६२ लाख ९७ हजार ७४१ रुपये मंजूर झाले. यात रॉ वॉटर पंपिंग मशिनरीसाठी तीन कोटी ३३ लाख ३४ हजार ७७७ रुपये मंजूर आहेत.
याशिवाय डेडरगाव पाणीपुरवठा योजनेच्या दुरुस्तीसाठी तीन कोटी ६२ लाख ३१ हजार ३५१ रुपये मंजूर आहेत. या मंजुरीतून सध्या तापी योजनेच्या दुरुस्तीचे कामही हाती घेण्यात येत आहे. पाचपैकी दोन जुने पंप काढले जाणार आहेत.
त्यामुळे जुने तीन व नवीन तीन असे एकूण सहा पंप तापी योजनेसाठी असतील. पाणीटंचाईच्या स्थितीमुळे सध्या चार पंप सुरू ठेवले आहेत; परंतु हे पंप जुने असल्याने ते नादुरुस्त होण्याचे प्रमाण अधिक आहे.
गेल्या आठवड्यात एक पंप बंद पडला होता. यामुळे शहरातील पाणीपुरवठ्याचे नियोजन कोलमडले होते. नवीन तीन पंप अत्याधुनिक आहेत. ते अधिक क्षमतेने कार्यरत राहतील. त्यामुळे शहरासाठी पूर्ण दाबाने पाणी मिळेल, त्यातून पाणी वितरणातील समस्याही दूर होतील, अशी अपेक्षा आहे.
हेही वाचा : Credit Card फसवणूक....काय घ्याल काळजी?
३५ वर्षे जुनी योजना
तापी पाणीपुरवठा योजना १९८८ पासून कार्यान्वित आहे. या योजनेला ३५ वर्षांहून अधिक काळ लोटला आहे. या योजनेंतर्गत सुलवाडे बॅरेजमध्ये शहरासाठी ४९७ एमसीएफटी पाणी आरक्षित ठेवले जाते. सुमारे ४५ किलोमीटर अंतरावरून या योजनेद्वारे पाणी धुळे शहरात आणले जाते.
त्यातून ६० टक्के शहराची पाण्याची तहान भागविली जाते. याशिवाय नकाणे तलाव, हरणमाळ तलाव, डेडरगाव तलावातूनही पाणी घेतले जाते. विशेषतः तापी योजनेवर मोठा भार असल्याने शहरात चार-पाच दिवसांआड पाणी देण्याचे नियोजन केले आहे.
मात्र, विविध तांत्रिक अडचणींमुळे वारंवार पाणीपुरवठ्याचे नियोजन कोलमडते. अक्कलपाडा योजनेसह तापी योजनेला बळकटीतून हे नियोजन सुरळीत होईल, धुळेकरांना किमान दिवसाआड पाणी मिळेल, अशी अपेक्षा आहे.
हे ही वाचा
