भाजीविक्रेत्या महिलेच्या फौजदार मुलाचा जैताणेत सत्कार

निजामपूर-जैताणे (धुळे) : माळमाथा परिसरातील कल्पनाबाई केशव माळी (बोरसे) या डोक्यावर भाजीपाला विकणाऱ्या विधवा महिलेच्या फौजदार झालेल्या मुलाचा आज (ता.31) जैताणे (ता.साक्री) ग्रामपंचायत कार्यालयात सरपंच संजय खैरनार यांच्या हस्ते सत्कार करण्यात आला.

जितेंद्र केशव माळी (बोरसे) असे त्या पितृछत्र हरपलेल्या व कठोर परिश्रमातून पीएसआय झालेल्या तरुणाचे नाव आहे. यापूर्वी जितेंद्रची आई कल्पनाबाई, आजी गोकुळबाई व लहान भाऊ नितीन यांचा तनिष्का व ग्रामपंचायतीतर्फे घरी जाऊन सत्कार करण्यात आला होता.

वयाच्या अवघ्या आठव्या वर्षी अर्थात बालपणीच पितृछत्र हरपलेला जितेंद्र माळी हा युवक आयटीआय व बारावी पास झाल्यानंतर सन 2008 साली जिद्दीने व मेहनतीने नाशिक पोलीस दलात भरती झाला. त्यानंतर नोकरी करत असतानाच दरम्यानच्या काळात त्याने मुक्त विद्यापीठातून बी.ए.ची पदवीही मिळवली. सन 2016/17 मध्ये झालेल्या खात्यांतर्गत पीएसआय पदाच्या परीक्षेत तो उत्तम गुणांनी उत्तीर्ण होऊन सध्या नाशिक येथील पोलिस प्रशिक्षण केंद्रात प्रशिक्षण घेत आहे. त्या पार्श्वभूमीवर जितेंद्रचा जैताणे गावी सुटीवर आलेला असताना ग्रामपंचायतीतर्फे हा सत्कार झाला.

यावेळी सरपंच संजय खैरनार यांच्यासह ग्रामविकास अधिकारी अनिल राठोड, उपसरपंच आबा भलकारे, ग्रामपंचायत सदस्य ईश्वर न्याहळदे, नवल खैरनार, सुरेश सोनवणे, प्रकाश पाटील, तुषार खैरनार, पंढरीनाथ सोनवणे, पंकज सोनवणे, शामभाऊ सूर्यवंशी, यादव भदाणे, गोरख सूर्यवंशी, शिक्षक दिलीप पाटकर, संतोष विसपुते, भीमा व्यापारे आदींसह ग्रामपंचायतीचे कर्मचारी व ग्रामस्थ उपस्थित होते. सरपंच खैरनार व पोलिस उपनिरीक्षक जितेंद्र माळी यांनी यावेळी मनोगत व्यक्त केले. पीएसआय माळी यांनी ग्रामपंचायतीचे विशेष आभार मानले.