स्वातंत्र्यानंतर पहिल्यांदा खैरवाडीत पाण्याचा टॅंकर

इगतपुरी शहर - खैरवाडी (ता. इगतपुरी) गावात पिण्याच्या पाण्यासाठी महिलांना चक्क विहिरीत उतरून पाणी भरावे लागत असल्याचे वृत्त मंगळवारी (ता. ७) ‘सकाळ’मध्ये प्रसिद्ध होताच प्रशासनाला खडबडून जाग आली. त्यांनी ग्रामपंचायतीमार्फत स्वातंत्र्यानंतर पहिल्यांदा खैरवाडीत पाण्याचा टॅंकर पाठविल्याने येथील ग्रामस्थांनी आनंदोत्सव साजरा केला. ‘सकाळ’ व श्रमजीवी संघटनेचे आभारही मानले.

पाण्याचा टॅंकर सुरू करण्यासाठी रस्त्याची अडचण असल्याने ग्रामस्थ व श्रमजीवी संघटनेने श्रमदान करून तात्पुरता रस्ता बनवला. त्यानंतर गटविकास अधिकाऱ्यांनी समन्वय साधून तातडीने मंगळवारी (ता. ७) तेथे छोट्या ट्रॅक्‍टरने पाण्याचा टॅंकर सुरू केला. स्वातंत्र्य मिळाल्यानंतर प्रथमच येथे टॅंकर आल्याने आदिवासी ग्रामस्थांनी सर्वांचे आभार मानले. आगामी काळात तेथे कायमस्वरूपी पिण्याच्या पाण्यासाठी उपाययोजना करण्यात येईल, असे गटविकास अधिकाऱ्यांनी सांगितले.

स्वातंत्र्यानंतर प्रथमच खैरेवाडी गावाला पाण्याचा टॅंकर देऊन प्रशासनाने दखल घेतली. या गावाला तृषार्तता राहू नये म्हणून श्रमजीवी संघटनेच्या पाठपुराव्याला यश मिळाले. ग्रामस्थांच्या वतीने प्रशासनाचे आम्ही आभार मानतो.
- भगवान मधे, सरचिटणीस, श्रमजीवी संघटना