पुणेकरांनो ही बातमी तुमच्यासाठी, बिल्डरचे नागपुरात अपहरण करून मागितली खंडणी

नागपूर : पुण्यातील वृद्ध प्रॉपर्टी डिलरचे पाच आरोपींनी अपहरण करून अडीच कोटींची खंडणी मागितली. तसेच त्यांची ७-८ हेक्टर जमीनही हडपली. या प्रकरणी धंतोली पोलिसांनी गुन्हे दाखल केले आहेत. याप्रकरणी बिल्डर मोहन एकनाथ दाणी (वय ६१, रा. विवेकानंदनर) यांनी राकेश वासुदेव डेकाटे, मुकेश वासुदेव डेकाटे, नरेश वासुदेव डेकाटे (रा. स्नेहनगर) महेश अरविंद साबळे (रा. सिव्हिल लाइन्स), मदन चंद्रकांत काळे (रा. टिळकनगर) यांच्याविरुद्ध तक्रार दिली होती. त्यापैकी राकेश, महेश आणि मदन याला पोलिसांनी अटक केली.

पोलिसांनी दिलेल्या माहितीनुसार, मोहन काळे सध्या पुण्यातील शिवाजीनगरला राहतात. डिसेंबर २०२०मध्ये त्यांना पैशांची गरज होती. त्यांनी महेश आणि मदनकडून दहा टक्के व्याजदराने दोन लाख रुपये उधार घेतले. त्यानंतर अमेरिकेत राहणाऱ्या मुलीकडे जाण्यासाठी महेश आणि मदनकडून १.३ लाख रुपयांचे हवाई प्रवासाचे तिकीट बुक केले.

अधिक वाचा - सकाळच्या वेळी शेतातून येत होता खळखळ आवाज; जाऊन बघताच तळपायाची आग गेली मस्तकात

तसेच त्यांना दोन लाख रुपयांचा डिमांड ड्राफ्ट अल्ट्राटेक सिमेंटच्या देयकापोटी दिला. परत आल्यानंतर आरोपींनी रक्कम परत करण्यास विलंब झाल्याचे कारण पुढे करत त्यांच्याकडे आठ लाख रुपयांची मागणी केली. तसेच मोहन काळे यांच्या नावावर मदन आणि महेश यांनी डेकाटे बंधूंना रक्कम उधार दिली. अशाप्रकारे रक्कम वाढत गेली. त्या आधारावर आरोपींनी हिंगणास्थित ७.८ हेक्टर जमीन मुकेश यांच्या नावावर करून घेतली.

कोऱ्या स्टॅंपपेपरवर घेतल्या सह्या

आरोपींनी काळे यांना पुण्यात जाऊन धमकावले. विवेकानंदनगरातील घर नावावर करण्यास सांगितले. काही दिवसांपूर्वी आरोपींनी काळे यांचे अपहरण करीत मुकेशच्या घाट रोडस्थित कार्यालयात नेऊन मारहाण केली. तिथे पन्नास कोऱ्या स्टॅम्पपेपरवर त्यांच्या जबरदस्तीने सह्या घेतल्या. तसेच ठार मारण्याची धमकी देत २.५० कोटींची मागणी केली. प्रॉपर्टीचे दस्तावेज हिसकावून घेतले.