ढगाळ वातावरणामुळे गहू, हरबऱ्याचे पीक धोक्यात; शेतकरी पुन्हा जाणार सावकारांच्या दारी

जलालखेडा (जि. नागपूर) : नरखेड तालुक्यात १० ते १५ दिवसांपासून असलेल्या ढगाळ वातावरणामुळे पिकांवर मोठा परिणाम होताना दिसत आहे. त्यामुळे शेतकरी मोठ्या चिंतेत सापडला आहे. चण्याची पेरणी होऊन जवळपास १ ते २ महिने झाले असून, चना पीक सध्या फुलावर व घेनगरावर आहे. परंतु, ढगाळलेल्या वातावरणामुळे पिकांवर किडीचा मोठ्या प्रमाणात प्रादुर्भाव होत आहे.

शेतकरी सतत या पिकावर फवारणी करीत असून, फारसा किडीचा प्रादुर्भाव कमी होताना दिसत नाही. तसेच मोठ्या प्रमाणात चना पिकावर मर रोगाचा प्रादुर्भाव झाला आहे. त्यामुळे उभे असलेले चण्याचे पीक जागेवरच वाळत आहे. त्यामुळे हाती असणारे चण्याचे पीक वाया जाताना दिसत आहे. जानेवारी महिना म्हटला की कडाक्याची थंडी, थंडीच्या वातावरणामध्येच चना, गहू पिकांची पेरणी केली जाते.

अधिक माहितीसाठी - भंडाऱ्यासारखी आग लागू नये म्हणून नक्की काय करावं? 'हे' आहेत रुग्णालयांसाठी सरकारनं आखून दिलेले नियम

थंडीमुळे या पिकांची वाढ चांगली होते व उत्पादनातही मोठ्या प्रमाणात वाढ होते. परंतु, यावर्षी ढगाळलेल्या वातावरणामुळे थंडी पडत नसल्यामुळे चना, गव्हाचे पीक धोक्यात आले आहे. पिकाची वाढ थांबली आहे. गहू लहान असतानाच त्याला उंबळ्या यायला सुरुवात झाली आहे. त्यामुळे उत्पनात मोठ्या प्रमाणात घट होताना दिसत आहे.

ढगालेल्या वातावरणामुळे पावसाची दात शक्यता असल्यामुळे कापणीला आलेले तुरीचे पीक अडचणीत सापडले आहे. यावर्षी शेतकऱ्यांचे मोठे नुकसान होताना दिसत आहे. शेतकऱ्यांना मोठे आर्थिक नुकसान सहन करावे लागणार आहे. लागलेला पैसे निघणे कठीण झाले आहे. त्यामुळे शेतकऱ्यांसाठी शासनाने आर्थिक पॅकेज जाहीर करावे अशी शेतकऱ्यांची मागणी आहे.

जाणून घ्या - "वाचवा होss लेकरांना वाचवा" जिवाच्या आकांतानं ओरडत होत्या माता; अखेर छकुल्यांच्या डोक्यावर पदर टाकून केला आक्रोश 

चणा पिकावर ‘मर’ रोगाचा प्रादुर्भाव
ढगाळलेल्या वातावरणामुळे पिकांची वाढ थांबली आहे. चणा पिकावर ‘मर’ रोगाचा प्रादुर्भाव होत असल्यामुळे चण्याचे उभे पीक वाळत आहे. कीडीचाही मोठ्या प्रमाणात प्रादुर्भाव होत आहे. गव्हाचे पीक लहान असतानाच उंब्यावर येत आहे. त्यामुळे उत्पनात मोठ्या प्रमाणात घट होण्याची शक्यता आहे. 
- हेमंत ठोबरे,
शेतकरी, मुक्तापूर

संपादन - नीलेश डाखोरे