व्वा रे जिल्हा परिषद... आर्थिक टंचाईत सल्लागारावर उधळण

नागपूर : जिल्हा परिषदेकडून निविदा तयार करण्याचे काम सल्लागाराकडून करण्याचा निर्णय परस्पर घेण्यात आला. यासाठी सल्लागाराला लाखो रुपये मोजण्याचा प्रस्ताव बांधकाम विभागाने तयार करून सभेत पाठविल्याने सल्लागार नियुक्तीचे बिंग फुटले. आर्थिक टंचाई असताना सल्लागारावर उधळण करण्याचा प्रस्ताव तयार केल्याने आश्चर्य व्यक्त करण्यात येत आहे.

आतापर्यंत निविदा तयार करणारे अधिकारी अचानक लायक नसल्याचे बांधकाम विभागाला आताच साक्षात्कार कसा झाला? असा सवाल उपस्थित होत आहे. या सल्लागाराची नियुक्ती बांधकाम विभागाकडून परस्पर करण्यात आली. या सल्लागाराची निवड कोणी व कोणत्या आधारे करण्यात आली, असा सवाल उपस्थित करण्यात येत आहे.

जिल्हाधिकारी कार्यालयासमोर जिल्हा परिषदच्या मालकीचे सरपंच भवन आहे. येथे लॉन तयार करण्यात आला आहे. त्याच प्रमाणे आता निवासी गाड्यांचेही नुतनीकरण करण्यात येत आहे. यावर लाखोंचा खर्च करण्यात येत आहे. येथील व्यवस्था खाजगी व्यक्तीकडे देण्याची जि.प.ची तयारी आहे. लॉन, हॉल, निवासी कक्ष, कॅन्टीन, सायकल स्टॅंड व इतर व्यवस्था खाजगी व्यक्तीकडे देण्यात येईल. या करता निविदा काढण्याचे निश्चित झाले.

जिल्हा परिषदेत घोटाळे, गैरव्यवहार थांबता थांबेना; आता हा घोटाळा आला उघडकीस 

सल्लागाराकडून निविदा तयार करण्यात येणार आहे. याकरता त्याला लाखो रुपये मोजण्याची तयारी जि.प. ने दर्शविली. सल्लागार म्हणून मे प्राईस वॉटर हाऊस कूपर्स प्रा.लि. यांची नियुक्ती करण्याचा निर्णयही झाला. याला सेस फंडातून रक्कम देण्याचे ठरले. विशेष म्हणजे याची नेमणूक करण्याचा विषय बांधकाम समितीच्या बैठकीत आला नसल्याची माहिती आहे. त्यामुळे याची निवड कोणत्या आधारावर झाली, असाच प्रश्न उपस्थित होत आहे.

विचारणा करण्यात येईल
सल्लागार अतिशय महागडा आहे. सर्वसाधारण सभेत हा विषय आला होता, तो नामंजूर करण्यात आला. याची निवड कोणी केली, याची विचारणा करण्यात येईल.
मनोहर कुंभारे, उपाध्यक्ष व सभापती, बांधकाम, जि.प.