मोठी बातमी! 'रासप'च्या नेत्यांचा राष्ट्रवादी काँग्रेसमध्ये प्रवेश; राज्यात संघटन मजबूत करणार

नागपूर ः राज्यात सत्तेत आल्यापासून राष्ट्रवादी काँग्रेसनं चांदा ते बांदा आपली पकड मजबूत करण्याचं काम हाती घेतलं आहे.  राज्यात महाविकास आघाडीची सत्ता आहे. राष्ट्रवादी आघाडीत सहभागी आहे. त्यामुळे शिवसेना आणि कॉंग्रेसचे नेते, कार्यकर्त्यांना पक्षात घेण्यास मर्यादा आहे. म्हणून आता इतर पक्षांतील नेत्यांना गळाला लावून राज्यात पक्ष मजबूत करण्याचे काम राष्ट्रवादीकडून सुरू असल्याचे बोलले जात आहे.

नुकतेच राष्ट्रीय समाज पक्षाच्या काही नेत्यांनी राष्ट्रवादी कॉंग्रेसमध्ये प्रवेश घेतला. राज्याचे उपमुख्यमंत्री अजित पवार व प्रदेशाध्यक्ष तथा राज्याचे जलसंपदा मंत्री जयंत पाटील यांच्या प्रमुख उपस्थितीत आणि राज्याचे अन्न व औषध पुरवठा मंत्री राजेंद्र शिंगणे यांच्या पुढाकाराने राष्ट्रीय समाज पक्षाचे प्रदेश उपाध्यक्ष सुभाष राजपूत यांनी काल राष्ट्रवादी काँग्रेस पक्षात प्रवेश केला.

अधिक वाचा -  पानिपतावर जिंकण्यासाठी नव्हे तर तत्वासाठी लढले मराठे; पहिल्यांदाच उघड झालीत धारातीर्थी पडलेल्या सरदारांची नावं 

राष्ट्रवादी कॉंग्रेसचे सर्वेसर्वा शरद पवार यांनी राज्यात भाजपला सत्तेपासून दूर ठेवण्यासाठी महाविकास आघाडी अस्तित्वात आणली. अतिशय कौशल्याने त्यांनी ही राजकीय खेळी केली. त्यानंतर राज्यावर पकड घट्ट करण्यासाठी संघटन मजबूत करण्याकडे लक्ष वळवले. महाविकास आघाडीतील सहकारी पक्षांच्या काही कार्यकर्त्यांनी मागील काळात राष्ट्रवादीत प्रवेश घेतल्यानंतर मोठे वादंग माजले होते. त्यामुळे राष्ट्रवादीने सहकारी पक्ष सोडून इतर पक्षांकडे आपला मोर्चा वळवला असल्याचे बोलले जाते.

राजपूत यांच्यासह हिंगोली जिल्ह्याचे रासप नेते कोंडिबा म्हस्के, वाशिम जिल्ह्यातील धनगर समाजाचे ज्ञानेश्वर मुखमाले तसेच विश्व भंडारी समाजाचे संस्थापक जयंत पाटकर, रासपचे कोकण संपर्क प्रमुख शैलेश पांजरी, रासप नेते सुमोत जाधव यांचाही राष्‍ट्रवादीत प्रवेश झाला. यावेळी पक्षाचे प्रदेश सरचिटणीस शिवाजीराव गर्जे उपस्थित होते.

जाणून घ्या - बहिण भावाला बोलवायला गेली, खिडकीतून दृश्य बघताच मोठ्यानं किंचाळली

रासप नेत्यांचा राष्ट्रवादी प्रवेश हा राष्ट्रवादीच्या नव्या रणनीतीचा एक भाग असल्याचेही राजकीय जाणकार सांगतात. यानंतरही राष्ट्रवादीत इनकमींग सुरू राहणार असल्याचेही राष्ट्रवादी प्रदेशचे नेते सांगतात. त्यामुळे ही भविष्यात होणाऱ्या निवडणुकांची तयारी असल्याचेही सांगितले जाते. 

संपादन - अथर्व महांकाळ