'आरटीई' प्रवेशाचा मुहूर्त ३ मार्चपासून, २१ मार्चपर्यंत अर्जनोंदणी

नागपूर : आर्थिकदृष्ट्या दुर्बल घटकातील विद्यार्थ्यांसाठी अनुदानित, विनाअनुदानित आणि खासगी शिक्षण संस्थांच्या शाळांमध्ये शिक्षण हक्क कायद्यांतर्गत प्रवेश दिले जातात. त्यानुसार ३ ते २१ मार्चपर्यंत पालकांना http://student.maharashtra.gov.in या संकेतस्थळावर ऑनलाइन नोंदणी करता येणार आहे. 

हेही वाचा - चिचपल्लीतील आगीची तज्ज्ञांकडून चौकशी होणार, वडेट्टीवारांनी जळीत बांबू प्रशिक्षण...

प्रत्येक शाळेत एकूण संख्येच्या २५ टक्के प्रवेश हे 'आरटीई'अंतर्गत दिले जातात. यासाठी दरवर्षी स्वतंत्रपणे प्रवेशप्रक्रिया राबविण्यात येते. शहरातील ६५० शाळांच्या ५ हजार २८६ जागांसाठी आरटीईमध्ये प्रवेश देण्यात येणार आहेत. गतवर्षी तुलनेत यावर्षी जागा कमी झाल्या आहेत. नागपूरमधून ६ हजार ६८५ जागांवर गेल्यावर्षी प्रवेश प्रक्रिया राबविण्यात आली होती. त्यासाठी ३१ हजारावर पालकांनी अर्ज करण्यात आले होते. राज्यात जानेवारी महिन्याच्या शेवटच्या आठवड्यात आरटीईची प्रक्रिया सुरू करण्यात येते. दरवर्षी आरटीई यंदाच्या प्रवेशप्रक्रियेची वाट बघणे आता सुरू झाले असून पालकांकडून शिक्षण विभागाकडे विचारणा करण्यात येत होती. त्यातूनच शिक्षण विभागाकडून आरटीईच्या प्रवेश प्रक्रियेसाठी तयारी पूर्ण करीत वेळापत्रक जाहीर केले. वेळापत्रकानुसार २१ मार्चपर्यंत पालकांना अर्ज नोंदवायचे आहेत. यासाठी आवश्यक कागदपत्रांची पूर्तता करून अर्ज करावे असे आवाहन करण्यात आले आहे. 

हेही वाचा - बापरे! दंड भरून करताहेत लग्न, आता नियमांचा भंग केल्यास थेट मंगल कार्यालयच होणार सील

अर्जसंख्या वाढणार -
आरटीई प्रवेशासाठी उत्पन्नाची अट शिथिल करण्यात आलेली आहे. त्यामुळे प्रवेशासाठी पालकांकडून विभागाला वारंवार विचारणा होताना दिसून येत आहे. यातूनच यंदा आरटीईच्या प्रवेश प्रक्रियेत अर्जांची संख्या वाढणार आहे. गतवर्षी ३१ हजारांवर पालकांनी अर्ज केले होते. यावर्षी ती वाढणार असल्याची शक्यता आहे.