आता प्रवेशासाठी चुरस, औषधनिर्माणसह कृषी अभ्यासक्रमाला विद्यार्थ्यांची पसंती

नागपूर : राज्यातील अभियांत्रिकी, औषधनिर्माणशास्त्र अभ्यासक्रमाच्या प्रवेशासाठी घेण्यात आलेल्या सामायिक परीक्षेचा (एमएचसीईटी) निकाल शनिवारी घोषित करण्यात आला. निकालानंतर आता विद्यार्थ्यांचे प्रवेशाकडे लक्ष लागले आहे. निकालात यावर्षी वाढ झाल्याने प्रवेशात यंदा चुरस दिसून येत आहे. अभियांत्रिकीची प्रक्रिया लांबल्याने यावेळी रिक्त जागांची समस्या कायम राहणार असून औषधनिर्माण अभ्यासक्रमाच्या प्रवेशासाठी गर्दी होणार असल्याचे चित्र आहे. 

हेही वाचा - जागतिक एड्स दिवस : प्रथमच घटला एचआयव्हीग्रस्तांचा आकडा...

यंदा शंभर पर्सेंटाईल म्हणजे सर्वाधिक गुण मिळवणाऱ्या विद्यार्थ्यांचे प्रमाण वाढले आहे. अभियांत्रिकीच्या प्रवेशासाठी ग्राह्य धरण्यात येणाया भौतिकशास्त्र, रसायनशास्त्र, गणित (पीसीएम) या विषय गटाची परीक्षा देणाऱ्या २२ विद्यार्थ्यांना १०० पर्सेंटाईल मिळाले आहेत. त्याशिवाय ८५ ते १०० पर्सेंटाईल मिळवणारे २६ हजार ५०२ विद्यार्थी आहेत. त्यामुळे नामांकित महाविद्यालयांतील प्रवेशासाठी स्पर्धा वाढणार आहे. 

हेही वाचा - मुदत संपली तरीही आरटीई प्रवेशाचे भिजत घोंगडे कायम, 122...

औषधनिर्माणशास्त्र अभ्यासक्रमाच्या प्रवेशासाठीच्या भौतिकशास्त्र, रसायनशास्त्र, जीवशास्त्र (पीसीबी) या विषय गटात सर्वोत्तम म्हणजे १०० पर्सेंटाईल मिळवणारे १९ विद्यार्थी आहेत. त्यामुळे मुळातच गेल्या काही वर्षांपासून विद्यार्थ्यांची मागणी वाढत असलेल्या या अभ्यासक्रमाच्या प्रवेशाची स्पर्धा यंदा वाढण्याची शक्यता आहे. २५ हजार जागांसाठी २ लाखांहून अधिक विद्यार्थी प्रवेशाच्या स्पर्धेत आहेत. त्यात ८५ पेक्षा अधिक पर्सेंटाईल मिळालेल्या विद्यार्थ्यांची संख्या ३२ हजार सातशे आहे. 

हेही वाचा - शिक्षण उपसंचालकांच्या खुर्चीसाठी 'लॉबिंग', इच्छुकांनी घेतली शिक्षणमंत्र्यांची भेट

अभियांत्रिकीवरचे संकट कायम - 
यंदा प्रवेश परीक्षेसाठी अर्ज करणाऱ्या विद्यार्थ्यांची संख्या वाढली. असे असले तरी त्यातील प्रत्यक्ष परीक्षा देणाऱ्या विद्यार्थ्यांची संख्या घटली आहे. गेल्या वर्षी राज्यातील ५६ हजार जागा रिक्त राहिल्या होत्या. अभियांत्रिकी शाखेच्या १ लाख ७४ हजार ६७९ विद्यार्थ्यांनी परीक्षा दिली. राज्यात अभियांत्रिकीच्या १ लाख २० हजार जागा उपलब्ध आहेत. यंदा प्रवेश प्रक्रिया उशिरा सुरू होत आहे. सध्या विद्यार्थ्यांनी इतर विषयांना प्रवेश घेतला आहे. त्यामुळे नामांकित महाविद्यालयांतील प्रवेशासाठी स्पर्धा असली तरी मधल्या फळीतील आणि तळातील महाविद्यालयांना यंदाही विद्यार्थी शोधावे लागणार असल्याचे चित्र आहे.