अकरावी प्रवेशात कोणत्या बोर्डातील विद्यार्थ्यांचा लागणार कस....वाचा सविस्तर

नागपूर  : दहावीच्या निकालात यंदा सीबीएसई विद्यार्थ्यांप्रमाणेच राज्य शिक्षण मंडळाचे विद्यार्थ्यांनी चांगली कामगिरी केली आहे. यंदा राज्याचा निकाल 95.30 टक्के लागला असून विभागाचा निकालही 93.84 टक्‍क्‍यावर म्हणजे 26.57 टक्के वाढल्याने याचा फायदा राज्य मंडळाच्या विद्यार्थ्यांना मिळणार आहे. त्यामुळे अकरावी प्रवेशावेळी दोन्ही मंडळाच्या विद्यार्थ्यांचा प्रवेशासाठी कस लागणार आहे.

अकरावी प्रवेशात राज्य शिक्षण मंडळाच्या दहावीतील विद्यार्थ्यांच्या तुलनेत दरवर्षी सीबीएसई दहावीचे विद्यार्थी सरस ठरतात असे चित्र असते. गेल्या वर्षी राज्य मंडळाचा निकाल 18 टक्‍क्‍यांनी पडला होता. सीबीएसई निकालातही अल्पशी घट झाली होती. यंदा राज्य मंडळाचा निकालात 26.57 टक्‍क्‍यांनी वाढला आहे. शिवाय दोन्ही बोर्डात प्रथम स्थान पटकावणाऱ्या विद्यार्थ्यांची टक्केवारी सारखी आहे.

नो टेंशन! ऍपद्वारे होणार आता अकरावीचे प्रवेश

सीबीएसई दहावीचा निकालात शहरातून 99.4 टक्‍के गुण मिळवत ओजस खमेले याने प्रथम स्थान पटकावले. मॉडर्न स्कूलच्या आद्या पांडे हिने 99.2 टक्‍यासह दुसरे तर भारतीय विद्या भवनच्या त्रिमूर्तीनगर शाखेचा विनिल मोखाडे याने 99 टक्‍क्‍यासह तिसरा क्रमांक पटकावला. राज्य मंडळाच्या निकालात जे. पी. कॉन्व्हेंटच्या समिक्षा पराते हिनेसुद्धा 99.4 टक्‍क्‍यांसह प्रथम स्थान पटकावले आहे. यापाठोपाठ याच शाळेतील सानिका गोतमारे, सोमलवार निकालसचा हृषिकेश चव्हाण, साउथ पब्लिक स्कुलची हिमांश्री गावंडे यांनी 98.40 टक्‍क्‍यांसह संयुक्तपणे दुसरे स्थान मिळवले. शिवाय दोन्ही मंडळांनी विद्यार्थ्यांना कला, क्रीडा प्रकारातील गुणांचा समावेश केल्यास त्यांची टक्केवारी 100 पेक्षा अधिक होण्याची शक्‍यता अधिक आहे.

राज्यातही हेच चित्र

राज्यात यावर्षी कला, क्रीडा प्रकारातील गुणांचा समावेश करुन 242 विद्यार्थ्यांना शंभरपैकी शंभर गुण मिळाले आहेत. याशिवाय 83 हजार 262 विद्यार्थ्यांना 90 टक्केपेक्षा अधिक गुण मिळाले आहे. राज्य मंडळाच्या दहावीच्या निकालामध्ये झालेली ऐतिहासिक वाढ आणि वाढत्या टक्केवारीमुळे सीबीएसईच्या विद्यार्थ्यांना यावेळी राज्यभरात अकरावी प्रवेशाची चुरस दिसणार आहे.