जीवनरक्षक औषधांचा तुटवडा

नागपूर : शासकीय वैद्यकीय महाविद्यालय व रुग्णालयात (मेडिकल) रुग्णसेवेसंदर्भात तक्रारी दूर करण्यासाठी वैद्यकीय अधीक्षकांना जबाबदार धरण्यात येते. नुकतेच मेडिकलच्या अतिदक्षता विभागासह कॅज्यअुल्टीमध्ये जीवनरक्षक औषधांचा तुटवडा असल्याची धक्कादायक माहिती पुढे आली आहे. विशेष असे की, अतिदक्षता विभाग तसेच कॅज्युअल्टीत "इमर्जन्सी-ट्रे' आवश्‍यक आहे, या ट्रेमध्ये एट्रॉपिन अत्यावश्‍यक आहे. परंतु, याच जीवनरक्षक औषधाचा तुटवडा असल्याची धक्कादायक माहिती पुढे आली आहे. मेडिकलच्या अधिष्ठातांनी दोन दिवसांपूर्वी येथील अतिदक्षता विभागात आकस्मिक भेट दिली. या भेटीतून हा प्रकार पुढे आला असल्याची माहिती पुढे आली. विशेष असे की, कॅज्युअल्टीमध्ये आवश्‍यक औषधी उपलब्ध आहेत, किंवा नाही याची पुसटशीही कल्पना वैद्यकीय अधीक्षक कार्यालयात नाही. मेडिकलमध्ये सध्या 55 टक्के औषधी असल्याची जोरदार चर्चा येथे आहे. मेडिकलचा मेडिसीन विभाग, फारमॅकोलॉजी विभाग तसेच संबंधित डॉक्‍टरांमध्ये समन्वय नसल्यामुळे कोणते औषध कधी उपलब्ध होईल, यासंदर्भात कोणतेही नियोजन नसल्याच्या चर्चेला उधाण आले आहे. मात्र, गरीब रुग्णांना याचा फटका पडतो. गरीब शेतकऱ्यांना फवारणीदरम्यान शरीरात विष गेले किंवा सर्पदंशामुळे भीती निर्माण झाल्यानंतर एट्रापिनसारखी औषध प्रभावी ठरते. परंतु, हे औषध येथे उपलब्ध नाही. साध्या पोटदुखीवर आवश्‍यक इंजेक्‍शन आणि औषधी "कॅज्युअल्टी'त उपलब्ध नाहीत. जीवनरक्षक असलेली डेक्‍सा, ऍट्रोफिल, डायक्‍नो, ऍसिडिटीवरील उपचारासाठी आवश्‍यक असलेली "रॅनटॅक', उलटी थांबवण्यासाठी आवश्‍यक असलेली "पॅरिनार्म', "कॅल्शियम ग्लुकोनो'ची लस, श्‍वसनाच्या आजारावरील डेरिफायलीन, ऍमिरोफायलीन कॅज्युअल्टीमध्ये उपलब्ध नसल्याने बीपीएलमध्ये मोडणाऱ्या रुग्णांच्या हाती प्रिस्क्रिप्शन दिले जात असल्याची तक्रार रुग्णांच्या नातेवाइकांकडून आली आहे. औषध खरेदीसंदर्भात "फॉर्मक' विभागाकडे बोट दाखवले. परंतु, मेडिकलमध्ये उपचारासाठी येणारा गरीब वर्ग औषध मिळेल, मोफत उपचार होतील या आशेवर असतो. मात्र, येथे रुग्णांची पिळवणूकच होत असते. त्याला या अंतर्गत असलेल्या शीतयुद्धाची माहिती नसते, हे विशेष.
अधिष्ठातांचे खरेदीचे आदेश
मेडिकलमध्ये दर दिवसाला "विष' घेतलेले पाच ते सहा रुग्ण उपचारासाठी येतात. पावसाळा आला आहे. यामुळे अशा शेतकरी रुग्णांची संख्या वाढेल. यामुळे आवश्‍यक जीवनरक्षक औषधांची गरज भासणार आहे. अधिष्ठाता डॉ. सजल मित्रा यांनी तत्काळ खरेदी करण्याचे आदेश दिले आहेत.