डॉ. आंबेडकर अकादमीला विजेतेपद

नागपूर : तेजस कुंभारेच्या नाबाद अर्धशतकाच्या जोरावर डॉ. आंबेडकर क्रिकेट अकादमीने अंतिम सामन्यात नागपूर क्रिकेट अकादमीचा आठ गड्यांनी पराभूत करून रेशीमबाग क्रिकेट क्‍लबतर्फे आयोजित 14 वर्षांखालील मुलांच्या आंतरशिबिर क्रिकेट स्पर्धेचे विजेतेपद पटकाविले. डीडीनगर शाळेच्या मैदानावर झालेल्या लढतीत प्रथम फलंदाजी करणाऱ्या नागपूर अकादमीने 20 षटकांत 6 बाद 90 धावा केल्या. साहिल पनकेने 20 व ओम तिवारीने 14 धावांचे योगदान दिले. आंबेडकर अकादमीकडून पार्थ पाटीलने सर्वाधिक दोन गडी बाद केले. आंबेडकर अकादमीने विजयी लक्ष्य 13.2 षटकांत केवळ दोन गडी गमावून गाठले. सामनावीर तेजसने नाबाद 57 धावा फटकावल्या. विराज अग्निहोत्रीने 17 धावांचे योगदान दिले. प्रमुख पाहुणे डॉ. अग्रवाल व डॉ. दिलीप क्षीरसागर यांच्या हस्ते पुरस्कार देण्यात आले. यावेळी क्‍लबचे संचालक राजू कावरे व डॉ. संजय देवतळे उपस्थित होते.