डॉ. आमटे दाम्पत्याचा "जीवनगौरव'; आज दिल्लीत सत्कार 

गडचिरोली : ज्येष्ठ समाजसेवक डॉ. प्रकाश व डॉ. मंदाकिनी आमटे यांना आज, रविवारी दिल्ली येथे "लाईफटाईम अचिव्हमेंट अवॉर्ड' अर्थात जीवनगौरव पुरस्काराने सन्मानित करण्यात येणार आहे. गेल्या चार दशकांपासून गडचिरोली जिल्ह्यातील आदिवासी बांधवांची आरोग्यसेवा करतानाच त्यांच्या सर्वांगीण उत्थानासाठी कार्य करण्यासाठी हा पुरस्कार बिल ऍण्ड मेलिंडा गेट्‌स फाउंडेशनचे उपाध्यक्ष बिल गेट्‌स यांच्या हस्ते मिळणार आहे. 

बिल गेट्‌स देणार पुरस्कार 
आमटे दाम्पत्य गडचिरोली जिल्ह्यातील भामरागड तालुक्‍यात कार्यरत आहेत. आदिवासींच्या सेवेबद्दल त्यांना आजवर अनेक राष्ट्रीय आणि आंतरराष्ट्रीय पुरस्कारांनी गौरविण्यात आले आहे. यापूर्वी त्यांना "रॅमन मॅगसेसे' पुरस्कारानेही सन्मानित करण्यात आले आहे. आज, रविवारी त्यांना बिल ऍण्ड मेलिंडा गेट्‌स फाउंडेशनचे उपाध्यक्ष बिल गेट्‌स यांच्या हस्ते सन्मानित करण्यात येणार आहे. हा पुरस्कार त्यांना नवी दिल्लीतील आयसीएमआर हॉल येथे आयोजित सोहळ्यात बहाल करण्यात येणार आहे. 

इतरही सत्कारमूर्ती 
आरोग्य आणि कुटुंब कल्याण मंत्रालय आणि इंडियन कौन्सिल ऑफ मेडिकल रिसर्च यांच्या वतीने आरोग्य सेवेत उल्लेखनीय योगदान देणाऱ्या मान्यवरांना या सोहळ्यात गौरवण्यात येणार आहे. यात डॉ. प्रकाश आमटे, डॉ. मंदाकिनी आमटे यांच्यासह डॉ. सायरस पूनावाला व डॉ. किरण मजुमदार-शॉ यांचाही समावेश आहे.