यवतमाळ : अवकाळी पावसाने खरिपातील पिकांच्या नुकसानाचा आकडा वाढला आहे. आतापर्यंत एक लाख 21 हजार शेतकऱ्यांनी कृषी विभागाकडे अर्ज सादर केले आहेत. त्यातील सात हजार अर्जांवर पंचनामे झाले असून शेतशिवारातील चिखलाने पंचनाम्याची गती मंदावली आहे.
गेल्या आठ ते दहा दिवसांपासून सुरू असलेल्या अवकाळी पावसाने जिल्ह्यातील शेतकऱ्यांचे कबंरडे मोडले आहे. नुकसानाचा आकडा दिवसागणीक फुगत आहे. आतापर्यंत तो अडीच लाख हेक्टरवर गेला असून अजूनही वाढण्याची शक्यता आहे. नेमके किती नुकसान झाले यांची पाहणी प्रशासनाकडून केली जात आहे. नुकसान झालेल्या शेतकऱ्यांनी अर्ज सादर करावेत, असे आवाहन कृषी विभागाने केले होते. आतापर्यंत एक लाख 21 हजार 198 शेतकऱ्यांनी कृषी विभागाकडे अर्ज सादर केले आहेत. यातील सहा हजार 918 शेतकऱ्यांचे पंचनामे झाले आहेत. त्यांच्या नुकसानीचा आकडा 18 कोटी 17 लाख 97 हजार रुपयांच्या घरात आहे. जसे पंचनामे पूर्ण होतील तसा हा आकडा वाढण्याची शक्यता आहे. आतापर्यंत पुसद, दिग्रस, उमरखेड तसेच महागाव या चार तालुक्यांतून सर्वाधिक 71 हजार 674 शेतकऱ्यांनी अर्ज सादर केले आहेत. यवतमाळ, कळंब, राळेगाव तसेच घाटंजी या चार तालुक्यांतून पाच हजार 171 अर्ज दाखल झाले आहेत. अर्ज देण्यासाठी अजूनही शेतकरी रांगेत असून नुकसान झालेल्या शेतकऱ्यांची संख्या आणखी वाढण्याची शक्यता आहे. अर्ज दाखल झालेल्या संख्येच्या तुलनेत पंचनाम्यांची गती मंदावली आहे. अनेक अडचणी तसेच शेतात जाण्यासाठी रस्ता नसल्याची कारणे समोर येत आहे. यामुळे पंचनामे पूर्ण करण्यासाठी आणखी आठ दिवस लागण्याची शक्यता वर्तविण्यात येत आहे.
शेतकरी आर्थिक संकटात
संपूर्ण विदर्भातील शेतकरी संकटात सापडलेला आहे. अवकाळी पावसामुळे पिकांचे मोठे नुकसान झाले आहे. सरकारकडून अद्यापही कोणतीही मदत मिळाली नसल्याने शेतकऱ्यांमध्ये रोष व्यक्त करण्यात आहे. जिल्हाधिकारी कार्यालयातर्फे सर्वेक्षणाचे काम सुरू आहे. परंतु, ते संथगतीने सुरू असल्याचा आरोप होत आहे. शासनाने त्वरित मदत द्यावी, अशी मागणीही पुढे होत आहे.
तालुका-अर्जांची संख्या
यवतमाळ-899
कळंब-1367
राळेगाव-716
घाटंजी-2189
दारव्हा-10725
नेर-7310
आर्णी-10820
बाभूळगाव-4445
पुसद-26485
दिग्रस-11735
उमरखेड-22884
महागाव-10570
पांढरकवडा-7495
वणी-565
झरी-2494
मारेगाव-499
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.