रेल्वे प्रवासात अश्लील चाळे करणाऱ्या शिक्षकाची महिलेकडून धुलाई

नांदुरा : शहरातील एका नामांकित महिला विद्या मंदिरात विद्येचे धडे शिकविणाऱ्या 'शिक्षका'ने रेल्वे प्रवासात एका महिलेसोबत अश्लील चाळे करण्याचा प्रयत्न केला असता सदर महिलेने त्या 'मनमोहन 'शिक्षकाची यथेच्छ धुलाई केल्याची चर्चा सध्या शहरात असून सदर धुलाईचा व्हिडीओ सोशल मीडियावर व्हायरल झाल्याने खमंग चर्चाना ऊत आला आहे.

सध्या पालकांमध्ये विद्यार्थाला उच्च शिक्षणासाठी इतर राज्यात पाठविण्याचे फॅड निर्माण झाले आहे. त्यासाठी जास्तीत जास्त पालकांची पसंती ही राजस्थान मधील कोटा येथे असल्याने व तेथे पाल्याची अॅडमिशन केली असल्याने या परिसरातील पालकांचे कामानिमित्त नेहमी येणे जाणे सुरू झाले आहे. नांदुरा शहरही त्याला अपवाद नसल्याने येथील कन्या विद्यालयाचे शिक्षक मनमोहन यांचेही पाल्य कोटा येथे शिक्षण घेत असल्याने  मनमोहन कोट्याला गेले व काम आटोपुन परतीच्या रेल्वे प्रवासाला लागले असता मलकापूर येथील महिला व हा नराधम शिक्षक प्रवासात एकत्र आले. या रेल्वे प्रवासात सदर शिक्षकाने या महिलेसोबत लगट करून अश्लील चाळे सुरू केले. सदर महिलेने ही बाब घरी आल्यानंतर आपल्या नातेवाईकाला सांगितली असता सदर शिक्षकाला नातेवाईकांनी मलकापूर येथे बोलावून 'त्या'महिलेने व त्यांच्या नातेवाईकांनी या मनमोहन शिक्षकाची यथेच्छ धुलाई केल्याची चर्चा नांदुरा शहरात रंगत आहे. सदरील धुलाईचा व्हिडीओ सोशल मीडियावर सध्या फिरत असल्याने शहरात एकच चर्चांना ऊत आला आहे.

कन्या विद्यालयात शिक्षकी पेशाने कार्यरत असलेल्या या शिक्षकाने हे अशोभनीय कृत्य केले आहे. यापूर्वी सुद्धा या 'मनमोहन' शिक्षकाने विद्यार्थिनीसोबत इलू इलू केल्याची चर्चा शहरात पसरत असल्याने कन्या विद्यालयात शिकणाऱ्या विद्यार्थिनीच्या पालकांमध्ये धास्ती निर्माण झाली आहे. शिक्षकाने नुकत्याच केलेल्या कृत्याबाबत संस्थाचालक या शिक्षकावर काय कारवाई करतात. याकडे शहरवासीयांचे लक्ष लागले असून कारवाई न झाल्यास काही पालक याबाबत तक्रार करणार असल्याचे समजते.

आपण एका क्लिकवर ताजे अपडेट्स आपल्या मोबाईलमध्येही मिळवू शकता.

• 'ई सकाळ'चे अॅप डाउनलोड करण्यासाठी क्लिक करा.
• शेतीविषयीची अपडेट असलेले 'अॅग्रोवन' अॅप डाउनलोड करण्यासाठी ​क्लिक करा.
• राजकारणाची प्रत्येक घडामोड कळविणारे 'सरकारनामा' अॅप डाउनलोड करण्यासाठी क्लिक करा.