नागपूर : संपत्तीच्या वादातून वडिलांचा खून

सिल्लेवाडा : संपत्तीचा वाद विकोपाला गेल्याने जन्मदात्याला मोठ्या आई-वडिलांच्या मदतीने अल्पवयीन मुलाने बेदम मारहाण केली. त्यात वडिलांचा मेयो रुग्णालयात उपचारादरम्यान मृत्यू झाला. जगमोहन बनवारीलाल शाक्य (वय-५०) रा. सिल्लेवाडा असे मृताचे नाव असून पोलिसांनी शनिवारी तिन्ही आरोपींना बेड्या ठोकल्या. या घटनेमुळे खळबळ उडाली आहे.

सिल्लेवाडा वेकोलि वसाहतीमधील जगमोहन बनवरीलाल शाक्य (वय-५०) हे कुटुंबासोबत राहतात. त्यांना अपंग मुलगी आणि १७ वर्षांचा अल्पवयीन मुलगा आहे. त्यांच्या शेजारी त्यांचा मोठा भाऊ ब्रिजमोहन बनवरीला शाक्य (वय-५४) राहतो. ब्रिजमोहन यांना मूलबाळ नसल्याने आपल्या लहान भावाच्या मुलाला लहानपणापासून आपल्याकडे ठेवून त्याचा सांभाळ केला. गेल्या काही दिवसांपासून जगमोहन आणि ब्रिजमोहन या दोघा भावांत संपत्तीचा वाद सुरू होता. यातून अनेकदा त्यांच्यामध्ये भांडण झाले.

कधी-कधी प्रकरण हमरीतुमरीवरही आले. मंगळवार, २८ जून रोजी जगमोहन याने ब्रिजमोहन याला काही कामासाठी शिडी मागितली. यावरून त्यांच्यात भांडण झाले. ते विकोपाला गेले व भांडणात ब्रिजमोहनसोबत, त्याची पत्नी आणि जगमोहन यांचा मुलगा सहभागी झाले. शाब्दिक भांडण हातघाईवर आले. तिघांनीही जगमोहन याला लाथाबुक्यांनी मारहाण केली. यात जगमोहनला गंभीर इजा झाली आणि तो बेशुद्ध झाला. जखमी अवस्थेत मृताच्या पत्नीने शेजाऱ्याच्या मदतीने जवळच्या चिचोली येथील प्राथमिक आरोग्य केंद्रात नेले.

मात्र, प्रकृती गंभीर असल्याने त्याला नागपूर येथे नेण्याचा सल्ला देण्यात आला. त्यामुळे जगमोहन यांना मेयोत दाखल करण्यात आले. त्यांच्यावर चार दिवसांपासून उपचार सुरू होते. शनिवारी त्यांचा उपचारादरम्यान मृत्यू झाला. या घटनेची माहिती मेयो पोलिस चौकीतील पोलिसांना देण्यात आली. पोलिसांनी लागलीच खापरखेडा पोलिसांना कळवले. सिल्लेवाडा येथे आरोपींच्या घरी पोलिस आले, तेव्हा घराला कुलूप होते. शेवटी तिन्ही आरोपींना अण्णामोड येथून अटक करण्यात आली. आरोपी ब्रिजमोहन शाक्य, त्याची पत्नी आणि अल्पवयीन मुलावर विविध कलामअंतर्गत गुन्हे दाखल करण्यात आले.