व्हॉट्सअ‌ॅप ग्रुप आले रुग्णांसाठी धावून, एका टचवर मिळतेय गरजूंना माहिती

नागपूर : बेड अव्हेलेबल आहे का.. तातडीने रेमडेसिव्हिर हवे होते... कोणाजवळ ऑक्सिजन सिलिंडरवाल्यांचा नंबर आहे का?.. दादा रेमडेसिव्हिर नको, शववाहिनीवाल्यांचा नंबर तेवढा द्या आता... या ना अशा अनेक मन हेलावून टाकणाऱ्या संदेशानी व्हॉट्सअ‌ॅ ग्रुप खणखणत आहेत. गरजूंना मदत म्हणून काही तरुणांनी व्हॉट्सअ‌ॅप ग्रुप स्थापन केले आहेत ज्या माध्यमातून गरजूंना मदतही मिळते आहे.

कोरोनाच्या दुसऱ्या लाटेत जिल्ह्यातील रुग्णांचा दररोजचा आकडा सरासरी ६ हजारांच्या घरात गेला आहे. शहरामध्ये रुग्णसंख्या वाढत असतानाच रुग्णांची होणारी गैरसोयही वाढली आहे. ही बाब लक्षात घेता शहरातील काही तरुणांनी व्हॉट्सअ‌ॅपचा आधार घेत मदतीसाठी ग्रुप तयार केले आहेत. या ग्रुपच्या माध्यमातून गरजूंना आवश्यक मदत पोहोचविण्याचा प्रामाणिक प्रयत्न सदस्यांकडून केला जातो आहे. रुग्णासाठी लागणाऱ्या औषधांपासून ते जेवणाच्या डब्यापर्यंत सर्व ती मदत या ग्रुपच्या माध्यमातून करण्यात येत आहे.

या दिवसांमध्ये अनेकांना आपल्या बाधित नातेवाइकांना उपचारासाठी खाटा मिळाव्यात म्हणून वणवण भटकावे लागत आहे. मात्र, व्हॉट्सअ‌ॅप ग्रुपमुळे एका टचवर ही माहिती गरजूंना उपलब्ध होते आहे. त्यामुळे, रुग्णालयाच्या येरझाऱ्या कमी झाल्या. तसेच, लागणारा वेळ आणि सहन करावा लागणारा मनस्ताप देखील कमी झाला आहे. या प्रयत्नातून रुग्णांच्या नातेवाइकांना मोठा धीर प्राप्त होतो आहे. डिजिटलच्या जमान्यात मदत करण्याची आणि एकमेकांसाठी धावून जाण्याची पद्धत बदलल्याच्या चर्चा ज्येष्ठांमध्ये रंगत आहेत.