शहर स्वच्छतेसाठी थेट मुख्याधिकाऱ्यांनीच हाती घेतला झाडू; 40 कर्मचाऱ्यांसह केली स्वच्छता 

सिरोंचा (जि. गडचिरोली) : शहरात दिवसेंदिवस घाण, कचरा, अस्वच्छतेचे साम्राज्य वाढत असून नागरिकांची सातत्याने ओरड होत असल्याने अस्वच्छतेविरोधातील या लढाईत हाती कुदळ, फावडे घेऊन प्रत्यक्ष नगरपंचायतीचे मुख्याधिकारी विशाल पाटील आपल्या 40 कर्मचाऱ्यांसह उतरले आहेत. मुख्याधिकारीच शहर स्वच्छतेच्या कामाला लागल्याने इतर अधिकारी, कर्मचारीही मन लावून स्वच्छता अभियान राबविताना दिसत आहेत.

सिरोंचा नगरपंचायतीचे मुख्याधिकारी विशाल पाटील यांनी स्वत: पुढाकार घेऊन शहर मुख्यालयात स्वच्छता अभियान राबविण्यात पुढाकार घेतला आहे. शहरातील प्रत्येक वॉर्डात तसेच प्राणहिता नदी परिसरात नगरपंचायतीच्या संपूर्ण 40 कर्मचाऱ्यांना सोबत घेत शहरात स्वच्छता अभियान राबविण्यास त्यांनी सुरुवात केली आहे. 

हेही वाचा - "साहब, वो झोपडीमे नही आते, उनकी फोटो लगाके त्यौहार मनाता...

2020-2021 माझी वसुंधरा योजनेअंतर्गत शहरात प्रत्येक वॉर्डात स्वच्छता अभियान राबविण्यात येत आहे. या योजनेअंतर्गत शुक्रवार (ता. 25) सकाळी शहरातील प्राणहिता नदी परिसरातील कचरा गोळा करण्याचे काम मुख्याधिकारी विशाल पाटील यांनी स्वत: पुढाकार घेऊन केले. तसेच त्यांना सहकार्य करण्याचे काम नगरपंचायतीच्या कर्मचाऱ्यांनी केले. 

हे स्वच्छता अभियान राबविण्यासाठी नगरपंचायतीचे अभियंता धर्मेंद्र घोडे, प्रशासकीय अधिकारी सचिन सनस, लिपिक अफसर सायद , जाहीर गोरमिया, पंप ऑपरेटर मोहसीन खान, व्यंकटेश जिटाबोईना आदींची प्रमुख उपस्थिती होती. ही मोहीम केवळ एक दिवसासाठी नसून यापुढेसुद्धा सुरूच राहणार असल्याचे मुख्याधिकारी विशाल पाटील यांनी सांगितले आहे. तसेच परिसरातील नागरिकांनी या नदी घाटाच्या परिसरात घरातील कचरा न टाकण्याचे आवाहन केले आहे.

नक्की वाचा - कॉंग्रेसच्या अधिवेशनापासून अधिक तीव्र झाली होती स्वातंत्र्य चळवळ; नागपूर अधिवेशनाला तब्बल १०० वर्ष...

कुजलेली समस्या सुटली

मागील अनेक महिन्यांपासून सिरोंचा शहरात घाणीचे साम्राज्य वाढून येथील अस्वच्छतेची समस्या दिवसेंदिवस कुजत चालली होती. पण, केवळ आपल्या हाताखालच्या कर्मचाऱ्यांना आदेश देत खुर्चीवर शांतपणे बसण्याऐवजी मुख्याधिकारी विशाल पाटील स्वत:च अस्वच्छता अभियानात सक्रिय झाल्याने आता ही अस्वच्छतेची समस्या कायमची सुटणार, असा विश्‍वास नागरिक व्यक्त करीत आहेत. तसेच या उपक्रमाचे नागरिकांकडून कौतुक करण्यात येत आहे.

संपादन - अथर्व महांकाळ