गडचिरोली : जागतिक महामारी असलेल्या कोरोनाचा संसर्ग पसरू नये म्हणून जिल्हा प्रशासन अतिशय गंभीरतेने काम करत आहे. त्यासाठी रविवारी सारीच दुकाने, विक्री केंद्रे बंद ठेवण्याचे जिल्हाधिकारी दीपक सिंगला यांनी आदेश दिले आहेत. पण, रविवारी अनेक ठिकाणी चिकन, मटण, मासेविक्रीची दुकाने सर्रास सुरू असल्याचे दिसून येत आहे. त्यामुळे या दुकानदारांसाठी व ग्राहकांसाठी रविवारी कोरोना सुटीवर, तर जात नाही ना, असा प्रश्न उपस्थित होत आहे.
जगभरात कोरोना विषाणूचे थैमान सुरू आहे. मात्र, जिल्हा प्रशासनाच्या खंबीर कामगिरीमुळे आतापर्यंत गडचिरोली जिल्ह्यात कोरोनाचा फारसा प्रकोप दिसून येत नाही. मार्च महिन्यापासून कोरोना संसर्गाचे सत्र सुरू झाले. पण, आतापर्यंत जिल्ह्यात केवळ एक मृत्यू झाला आहे. या मृत्यू ज्या व्यक्तीचा झाला त्याला हृदयविकार असल्याने खरेच कोरोनामुळे मृत्यू आला का, हेही ठामपणे सांगता येत नाही.
अनेक जिल्ह्यात कोरोनामुळे मृत्यूसत्र सुरू असताना गडचिरोली जिल्ह्यात कोरोना प्रतिबंधासाठी उचललेल्या कठोर पावलांमुळे त्याला वेशीवरच थांबविण्यात यश आले. पण, अनेकजण सरकारच्या नियमांचे सर्रास उल्लंघन करताना दिसतात.
या बेजबाबदार वृत्तीमुळे प्रशासनाचे परीश्रम पाण्यात जाण्याची शक्यता निर्माण झाली आहे. जिल्हाधिकाऱ्यांनी रविवारी पूर्णपणे बंद पाळण्याचे आदेश दिले असतानाही सकाळपासून अनेक ठिकाणी चिकन, मटण, मासळीची विक्री होताना दिसत आहे. काहीजण घरी, जर काहीजण थेट दुकान उघडून सर्रास विक्री करतात.
रविवारी (ता. 23) येथील कारगिल चौकातील मासळी बाजार नेहमीप्रमाणेच सुरू होता. हा प्रकार असाच सुरू राहिल्यास कोरोनाचा प्रकोप वाढण्यास वेळ लागणार नाही. त्यामुळे या प्रकाराकडे जिल्हा प्रशासनाने लक्ष देण्याची मागणी होत आहे.
जिल्हा प्रशासनाने रविवारी सारीच दुकाने बंद ठेवण्याचे आदेश दिलेले असतानाही अनेक मांस विक्रेते मुजोरीने आपली दुकाने सुरू ठेवतात. नगर परिषद व जिल्हा प्रशासनाचे पथक त्यांच्यावर कारवाई करते. पण, ते दंड भरून पुन्हा विक्री सुरूच ठेवतात. त्यामुळे "दंड भरू, पण विक्री करू' हेच धोरण या विक्रेत्यांनी स्वीकारले आहे.
संपादन - अथर्व महांकाळ
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.