चोरट्याने पोलिसाला बनवले ‘मामा’

नागपूर - सामान्यांना सायबर चोरट्यांपासून सावध राहण्याचे आवाहन पोलिस नेहमी करीत असतात. मात्र, यावेळी चोरट्याने पोलिस दादालाच ‘मामा’ बनवले. पोलिस कर्मचाऱ्याची २० हजार रुपयांनी फसवणूक केली. या प्रकरणी गिट्टीखदान पोलिसांनी गुन्हा दाखल केला. 

पोलिसांनी दिलेल्या माहितीनुसार, गिट्टीखदान हद्दीतील कामगार नगर, पोलिस लाइन टाकळी, नागपूर येथे राहणारे दीपक शालीकराम झाडे (४५) हे पोलिस विभागात कार्यरत आहेत. २० मार्च रोजी दुपारी साडेतीन वाजताच्या सुमारास घरी असताना त्यांना अनोळखी आरोपी बजाज फायनान्स कंपनीच्या क्रेडिट कार्डचा ओटीपी नंबर विचारून त्यांच्या नावावर अज्ञात आरोपीने फ्लिपकार्ट कंपनीच्या माध्यमातून ३९ हजार ०६९ रुपयांचा ॲपल कंपनीचा मोबाईल विकत घेतला. या मोबाईलची किस्त भरण्याच्या संबंधाने झाडे यांच्या नागपूर नागरिक सहकारी बॅंकेच्या खात्यातून २० हजार रुपये कापून घेतले. हा प्रकार फिर्यादीच्या लक्षात येताच त्यांनी बजाज फायनान्स कंपनीमध्ये जावून विचारपूस केली असता त्यांच्या नावाने अज्ञात आरोपीने मोबाईल फोन विकत घेवून फसवणूक केल्याचे लक्षात आले.