चार वर्षांच्या मुलीवर अत्याचार

नागपूर - चार वर्षांच्या मुलीवर शेजारी राहणाऱ्या १६ वर्षांच्या मुलाने लैंगिक अत्याचार केल्याची घटना नंदनवन पोलिस ठाण्यांतर्गत घडली. या प्रकरणी गुन्हा दाखल करून आरोपी मुलाला ताब्यात घेण्यात आले.

पीडित मुलगी व आरोपी एकमेकांचे शेजारी आहेत. ५ मे रोजी दुपारी ४ ते ५.३० च्या दरम्यान पीडित मुलीची आई स्वयंपाक करीत होती. त्यावेळी ती घराजवळ खेळत होती. त्यावेळी आरोपी तिला फ्रूटी देण्याच्या बहाण्याने सोबत घेऊन गेला. तिला फ्रूटी दिली व स्वत:च्या घरात नेऊन अत्याचार केला. संध्याकाळी मुलगी घरी परतली असता ती भेदरलेली होती. ती आजारी असावी, असा तिच्या आई-वडिलांचा समज झाला. पण, शेजारी राहणाऱ्या मुलाला बघून ती घाबरून पळू लागली. एरवी ज्या मुलाकडे ती जायची, त्याला घाबरू लागल्यानंतर तिच्या आई-वडिलांना शंका आली. त्यांनी विचारणा केली असता तिने झालेला प्रकार सांगितला. त्यांनी पोलिस ठाणे गाठून तक्रार दिली. पोलिस उपनिरीक्षक रवी बारड यांनी गुन्हा दाखल केला असून, आरोपी मुलाला ताब्यात घेतले.