रोगराईमुळे धानपीकाचे एकरी फक्त ७ ते १० पोतेच उत्पन्न, भावही मातीमोल

सावली (जि. चंद्रपूर ) :  धान चांगल्या स्थितीत असताना रोगाने हल्ला चढविला. काही प्रमाणावर रोग आटोक्‍यात येत असतानाच धानावर तुडतुड्याचा प्रादुर्भाव झाला. धान कापेपर्यंत संपूर्ण पीकाचे नुकसान झाले. महागडी कीटकनाशक फवारणी केल्यानंतर किडीचा प्रादुर्भाव आटोक्‍यात आला नाही. याचा परिणाम धानाच्या उतारीत मोठी घट झाली. एकरी सात ते दहाच पोते हाती येत असल्याने शेतकरी हवालदिल झाला आहे. 

हेही वाचा - अंकिता जळीतकांड : पहिल्याच दिवशी आरोपीचे वकील गैरहजर;...

जिल्ह्यात मोठ्या प्रमाणावर धानाचे पीक घेतले जाते. यंदा चांगला पावसाचा अंदाज हवामान खात्याने वर्तविला. त्यानुसार जूनच्या पहिल्या आठवड्यात पावसाने हजेरी लावली. समाधानकारक पावसाने शेतकऱ्यांनी धानाची पेरणी केली. तालुक्‍यात 24 हजार 638 हेक्‍टर क्षेत्रावर धानाची लागवड केली. समाधानकारक पावसाने धान चांगल्या अवस्थेत होते. मधल्या काळात अवकाळी पाऊस झाला. त्यानंतर वातावरण ढगाळ होते.

हेही वाचा - काँग्रेस अन् राष्ट्रवादीच्या मैत्रीमध्ये फूट पडतेय का?

हेच वातावरण किडीस पोषक ठरले. धानावर मावा, करपा, तुडतुड्याने हल्ला चढविला. त्यानंतर कृषी विभागाच्या सल्ल्यानुसार शेतकऱ्यांनी महागड्या फवारणी केली. मात्र, त्याचा काहीच फायदा झाला. धान कापणीपर्यंत त्याचे नुकसान झाले. शेवटी धानाचे चुरणे केल्यानंतर त्याची उतारी एकरी 5-6 पोते आले. त्यामुळे बळीराजा आर्थिक विवंचनेत सापडला आहे. धानाला 700 रुपये बोनस देण्याची घोषणा केली. मात्र, ती रक्कम अद्याप खात्यात जमा झाली नाही. हमीभावही मिळत नाही. त्यामुळे शेतकरी संकटात सापडला आहे.