सुनील केदार म्हणाले, अपमान करणाऱ्यांना अटक करा

खापरखेडा (जि. नागपूर) : सिल्लेवाडा सरपंचाला उद्देशून करण्यात आलेल्या अश्‍लील वक्तव्य हे सरपंचाचा अपमान करणारे आहे. तक्रारीनंतर ग्रामपंचायत सदस्य अनिल तंबाखे यांच्यावर गुन्हे दाखल केले. मात्र, अद्याप पोलिसांनी अटक केली नाही. यामुळे आरोपींना आठ दिवसांत अटक करावी अशी मागणी सावनेरचे आमदार सुनील केदार यांनी केली.
शहर बससेवेच्या उद्‌घाटनावरून कॉंग्रेस-भाजप कार्यकर्त्यांत वाद निर्माण झाला होता. यानंतर भाजपने निषेध रॅली काढून आंदोलन केले. त्यावेळी झालेल्या सभेत तंबाखे यांनी सिल्लेवाडाच्या सरपंचांना उद्देशून अश्‍लील वक्तव्य केल्याने हा वाद आणखीच चिघळला. सिल्लेवाडा सरपंच प्रमिला बागडे यांनी दिलेल्या तक्रारीवरून खापरखेडा पोलिसांनी तंबाखे यांच्यावर ऍट्रॉसिटीसह विविध गुन्हे दाखल केले आहेत. आरोपीला अटक करावी अशी मागणी करीत आज मंगळवारी खापरखेडा येथे निषेध सभा घेण्यात आली. या सभेत केदार यांनी ही मागणी केली. केदार म्हणाले, कोणत्याही महिलेचा अपमान सहन करणार नाही. तर महिला सरपंचांविरुद्ध केलेले वक्तव्य निंदनीय आहे. पोलिसांनी आरोपीला अटक करून न्याय देण्याची भूमिका घ्यावी.
सभेनंतर खापरखेडाचे ठाणेदार चंद्रकांत मदने यांना सिल्लेवाडा सरपंच बागडे यांनी आमदारांसह कॉंग्रेसच्या कार्यकर्त्यांनी निवेदन दिले.यावेळी उपसरपंच मधू दुगाणे, भानेगावचे सरपंच रवींद्र चिखले, खापरखेडाचेसरपंच पुरुषोत्तम चांदेकर, उपसरपंच अर्चना ठवरे, पं.स.चे माजी उपसभापती आशीष उपासे, वलनीचे सरपंच लईक अन्सारी, पोटाच्या सरपंच वंदना ढगे, शांता कुंमरे, बसपच्या नेत्या बागडे, सविता भड, तापेश्वर वैद्य, दयाराम भोयर, बबन भड प्रामुख्याने उपस्थिती होते. निषेध सभेसाठी खापरखेडा, सिल्लेवाडासह परिसरातील नागरिकांसह संपूर्ण विधानसभा मतदारसंघातून केदार यांच्या समर्थकांनी हजेरी लावली होती.