भरधाव ट्रकने युवतीला चिरडले

नागपूर : भरधाव ट्रक ओव्हरटेक करीत असताना दुचाकीस्वाराने रस्त्याच्या कडेला गाडी घेतली. मात्र, नियंत्रण सुटल्याने दुचाकीस्वार तरुणी ट्रकच्या मागील चाकात चिरडली गेली. ही घटना नागपूर-कळमेश्‍वर मार्गावर गोरेवाडा प्राणिसंग्रहालयाच्या सफारी प्रवेशद्वाराजवळ घडली. मयूरी झोडापे (20, रा. फेटरी) असे मृत तर शुभम डोंगरे (17) असे जखमीचे नाव आहे.
पोलिसांनी दिलेल्या माहितीनुसार, मयूरी ही शुभमसह एमएच-31, डीई-1481 क्रमांकाच्या मोपेडने नागपूरवरून घरी फेटरी येथे जात होती. मोपेड शुभम चालवत होता. दुपारी तीन वाजताच्या सुमारास गोरेवाडा प्राणिसंग्रहालयाच्या सफारी प्रवेशद्वारापासून काही अंतरावर असताना मागून एमएच-31, सीबी-5937 क्रमांकाचा ट्रक भरधाव येत होता. ट्रकला जागा देण्यासाठी शुभम दुचाकी रस्त्याच्या कडेला घेत असताना काठावरून दुचाकीचे चाक घसरले. त्यामुळे दोघेही जमिनीवर पडले. शुभम हा डाव्या बाजूला पडला व मयूरी उजव्या हातावर पडली. ट्रकच्या मागील चाकात ती सापडली व चिरडली गेली. माहिती मिळताच गिट्टीखदान पोलिस ठाण्याचे वरिष्ठ पोलिस निरीक्षक गिरीश गुरव, उपनिरीक्षक स्वाती यावले व इतर कर्मचारी घटनास्थळी पोहोचले. पोलिसांनी तत्काळ जखमींना रुग्णालयात दाखल केले. शुभमवर उपचार सुरू आहे. गिट्टीखदान पोलिसांनी ट्रकचालकाविरुद्ध गुन्हा दाखल केला.