मोहगाव तलावात बुडून दोन विमा एजंटचा मृत्यू

हिंगणा (जि. नागपूर) : तालुक्‍यातील मोहगाव (झिल्पी) तलावाजवळ पर्यटनासाठी आलेल्या दोन मित्रांचा तलावात बुडून मृत्यू झाला. ही घटना आज शनिवारी दुपारी तीन वाजताच्या सुमारास उघडकीस आली. कमलेश रमेश शाहकार (वय 36, रा. कळमना, नागपूर) व देबोजित कल्याण बॅनर्जी (वय 36, रा. दुर्गावती चौक, पाचपावली, नागपूर) अशी मृतांची नावे आहेत. दोघेही विमा एजंट आहेत.
शनिवारी दुपारी काही नागरिकांना तलावाच्या काठावर दोन दुचाकी बेवारस स्थितीत आढळून आल्या, तर तलावात दोन मृतदेह तरंगताना दिसले. मोहगावच्या सरपंचांनी याची माहिती हिंगणा पोलिसांना दिली. पोलिसांनी दिलेल्या माहितीनुसार, शुक्रवारी सकाळी 9 वाजता दोघेही त्यांच्या दुचाकींनी हिंगणा तालुक्‍यातील मोहगाव शिवारातीला झिल्पी तलावावर आले होते. शनिवारी दुपारी बारा वाजता या परिसरातील काही लोकांना त्यांचे मृतदेह पाण्यावर तरंगताना दिसले. दुचाकी काही अंतरावर उभ्या करण्यात आल्या होत्या. सहायक पोलिस निरीक्षक नितीन कुंभार व चमू घटनास्थळी दाखल झाली व दोघांचेही मृतदेह पाण्याबाहेर काढण्यात आले. त्यांच्या कपड्यात असलेल्या ओळखपत्रावरून ओळख पटविण्यात आली व नातेवाईकांना सूचना देण्यात आली. याप्रकरणी पोलिसांनी आकस्मिक मृत्यूची नोंद केली आहे.