धारदार शस्त्राने भोसकून युवकाचा खून

नागपूर - अपघातात दुचाकीला झालेले नुकसानभरपाई देण्याच्या वादातून तिघांनी एका युवकाचा तलवार आणि चाकूने सपासप वार करून खून केला. ही थरारक घटना मंगळवारी रात्री दहा वाजताच्या सुमारास नंदनवनमधील जय जलारामनगर, चामट चौकात घडली. 

राहुल शंकर खुबाडकर (२४, रा. महाभक्‍ती लेआउट, वाठोडा) असे खून झालेल्या युवकाचे नाव आहे. घटनेनंतर पोलिसांनी दोन आरोपींना अटक केली असून विशाल गजभिये आणि नितीन ठाकूर अशी आरोपींची नावे आहेत. तर एक आरोपी फरार आहे. 

प्राप्त माहितीनुसार, आरोपीच्या वाहनाशी राहुलच्या भावाच्या वाहनाचा अपघात झाला होता. त्याला दुखापतही झाली होती आणि वाहनाचे नुकसानही झाले होते. राहुल गाडीच्या नुकसानभरपाईसह उपचारासाठी पैसे मागत होता. रात्री ९ वाजताच्या सुमारास तो जलारामनगरमध्ये विशालची भेट घेण्यासाठी आला. येथे दोघांमध्ये भांडण झाले. भांडण विकोपाला गेल्यानंतर विशाल, नितीन आणि अज्ञात आरोपीने जवळील  चाकू आणि तलवारी काढून राहुलच्या पोटावर, छातीवर आणि हातावर सपासप वार करून त्याला रक्ताच्या थारोळ्यात लोळविले. राहुल खाली कोसळताच आरोपी घटनास्थळावरून फरार झाले. खून झाल्याची माहिती पसरताच परिसरात एकच खळबळ उडाली. घटनेची माहिती मिळताच नंदनवन पोलिस तत्काळ घटनास्थळी दाखल झाले. 

पोलिसांनी मृतदेह ताब्यात घेत तपास सुरू केला. घटनेच्या अवघ्या काही वेळातच पोलिसांनी विशाल आणि नितीनला अटक केली. तर त्यांचा एक साथीदार घटनास्थळावरून फरार होण्यास यशस्वी झाला आहे. पोलिस फरार आरोपीचा शोध घेत आहेत. क्षुल्लक कारणातून झालेल्या या हत्येने परिसरात दहशतीचे वातावरण निर्माण झाले होते.