मुझको भी तू मेंटेन करा दे! 

बाइकची मस्त राइड घ्यायला, इम्प्रेशन मारायला आपल्या सगळ्यांना आवडतंच; पण जी बाइक किंवा टू-व्हीलर आपल्याला इतकी उपयोगी पडते, आपली काळजी घेते; तिची काळजी आपण घेतो का? आपण आपल्या शरीराची, आहाराची, कपड्यांची काळजी घेतो; तशी बाइकचीही काळजी घ्यायला पाहिजेच. अनेक जण घेत असतीलच; पण अनेक जण त्याकडे दुर्लक्ष करतात. बाइकची छान काळजी घेतली, तर ती आपली काळजी घेते. त्यामुळे बाइकचा मेंटेनन्स कसा राखायचा, याचे काही सोपे कानमंत्र आपण बघूया.

बाइक स्वच्छ ठेवा 
खरं तर अगदी साधा सोपा मंत्र; पण अनेकांना ते जमत नाही. बाइक रोजच्या रोज पुसायला पाहिजेच; पण किमान पंधरा दिवसांमधून ती धुवायला पाहिजे. शक्य असल्यास प्रेशर वॉशिंग तीन महिन्यांमधून तरी नक्की करा. याचे खूप फायदे आहेत. एक तर बाइक छान दिसतेच, पण खूप धूळ, चिखल साठत गेला, तर गंज चढण्याचा धोका असतो. अनेक पार्ट्स खराबही होऊ लागतात. त्यामुळे क्लीनिंग इज मँडेटरी. 

सराफी व्यावसायिकाचा पिस्तुलातुन गोळी झाडून आत्महत्येचा प्रयत्न

टायरचं प्रेशर योग्य ठेवा 
टायर हे ट्यूब असलेलं असो किंवा ट्यूबलेस, त्यातलं हवेचं प्रेशर योग्य प्रमाणातच हवं. ते जास्त झालं, तर टायर फुटण्याचा धोका आणि कमी झालं, तर मायलेजपासून पंक्चरपर्यंत अनेक गोष्टींचा धोका. त्यामुळे योग्य प्रेशर सतत मेंटेन करा. हवा भरण्याचं एकच गॅरेज ठेवलंत तर उत्तम. टायर प्रेशर नियमितपणे चेक करण्यामुळं पंक्चर असल्यास त्याचा अंदाज लवकर येतो आणि नंतरचे अनेक त्रास वाचतात. 

चेन टाइट हवी 
गाडीची चेन हा दोन चाकांना जोडणारा दुवा असतो. तो व्यवस्थित पाहिजे. तुम्हाला अनेकदा चेन लूज झाल्याचा आवाज येत असतो; पण तुम्ही त्याकडे दुर्लक्ष करता. मात्र, त्यामुळे घर्षण जास्त वाढतं आणि चेन तुटण्याचा धोका असतो. गाडी चालवत असताना चेन अचानक तुटली, तर त्यामुळे जीवघेणे अपघात होतात. चेन लूज असेल तर गाडीचं मायलेजही कमी होतं. चेनचं ऑईलिंगही शक्य असल्यास स्वतः नियमितपणे केलंत, तर त्यामुळं चेनचं आयुष्य वाढेल. 

ताज्या बातम्यांसाठी डाऊनलोड करा ई-सकाळचे ऍप

पुण्याच्या बातम्या वाचण्यासाठी येथे ► क्लिक करा

नियमित सर्व्हिसिंग 
गाडी कितीही उत्तम चालत असली, तरी ती नियमितपणे सर्व्हिंसिंगला द्यायलाच हवी. अनेक त्रुटी तुमच्या लक्षात येत नाहीत- पण मेकॅनिकच्या बरोबर लक्षात येतात. त्यामुळे सर्व्हिंसिंग पाहिजेच. खूप काळानंतर सर्व्हिसिंग केलंत, तर खर्च वाढतात- कारण अनेक भाग मर्यादेपुढे खराब झालेले असतात. नियमितपणे सर्व्हिसिंग करण्याची सवय असेल, तर हे खर्च आटोक्यात राहतात. नियमित सर्व्हिसिंगमुळे अचानक होऊ शकणारे बिघाड जवळजवळ रद्द होतात, मायलेज चांगलं राहतं आणि गाडी एकदम फिट राहते.