Sudesh
अ‍ॅपल कंपनीचे आयफोन हे जेवढे फीचरफुल असतात, तेवढेच ते महाग देखील असतात.
हे आयफोन पाण्यात पडून खराब होऊ नयेत यासाठी यूजर्स नेहमीच प्रयत्नशील असतात.
मोबाईल पाण्यात पडल्यानंतर कित्येक लोक तो वाळावा यासाठी तांदळात ठेवतात.
तांदूळ या मोबाईल किंवा इलेक्ट्रॉनिक वस्तूमधील पाणी (आद्रता) शोषूण घेतो, यामुळे हा उपाय सर्वमान्य आहे.
मात्र, अ‍ॅपलने आता आपल्या ग्राहकांना असं न करण्याचा इशारा दिला आहे. सोबतच, फोन वाळवण्यासाठी हेअर ड्रायरचा वापर करू नये असंही कंपनीने म्हटलं आहे.
भिजलेला आयफोन तांदळात ठेवल्यामुळे तांदळाचे लहान लहान कण फोनमध्ये शिरू शकतात असं कंपनीने म्हटलं आहे. यामुळे फोन अधिक खराब होण्याचा धोका आहे.
कंपनीने सांगितलं, की आयफोनमधील पाणी बाहेर काढण्यासाठी, कनेक्टर खालच्या बाजूला असेल अशा स्थितीत तो फोन हळू-हळू आपल्या हातावर आपटा.
यानंतर फोन कोरड्या भागात ठेवून द्यावा आणि 30 मिनिटांनी चार्जिंगला लावावा असंही कंपनीने सांगितलं. यानंतर सुमारे 24 तासांमध्ये फोन पूर्णपणे वाळेल, असं अ‍ॅपलने स्पष्ट केलं.