प्रणाली कोद्रे
इंडियन प्रीमियर लीग अर्थात आयपीएल स्पर्धेचा सध्या 17 वा हंगाम सुरू आहे. पण या आयपीएलची सुरुवात कधी झाली माहित आहे का?
तर, आयपीएलच्या इतिहासातील पहिला सामना झाला होता १८ एप्रिल २००८ रोजी बेंगळुरूमधील एम चिन्नास्वामी स्टेडियवर.
आयपीएलच्या पहिल्या सामन्यात रॉयल चॅलेंजर्स बेंगळुरू आणि कोलकाता नाईट रायडर्स हे दोन संघ आमने-सामने आले होते.
कोलकाता संघाचा त्यावेळी कर्णधार होता सौरव गांगुली, तर बेंगळुरूचा कर्णधार होता राहुल द्रविड.
त्या सामन्यात द्रविडने टॉस जिंकला आणि पहिली गोलंदाजी करण्याचा निर्णय घेतला.
मात्र, त्या सामन्यात प्रथम फलंदाजी करण्यासाठी उतरलेल्या कोलकाताकडून ब्रेंडन मॅक्युलमचे वादळ आले. सलामीला उतरलेल्या मॅक्युलमने 73 चेंडूत 10 चौकार आणि 13 षटकारांचा पाऊस पाडत 158 धावा चोपल्या.
त्यामुळे कोलकाताने 20 षटकात 3 बाद 222 धावा केल्या होत्या. बेंगळुरूकडून गोलंदाजीत झहिर खान, ऍश्ली नोफके आणि जॅक कॅलिस यांनी प्रत्येकी 1 विकेट घेतली होती.
त्यानंतर 223 धावांच्या आव्हानाचा पाठलाग करताना बेंगळुरूचा संघ 15.1 षटकातच 82 धावांवर सर्वबाद झाला. त्यामुळे हा सामना कोलकाताने तब्बल 140 धावांनी जिंकला.
बेंगळुरूकडून फक्त प्रविण कुमारने (18) 10 धावांचा टप्पा पार केला. कोलकाताकडून अजित अगरकरने सर्वाधिक 3 विकेट्स घेतल्या.