Pranali Kodre
भारताचा सलामीवीर आणि पंजाब किंग्सचा कर्णधार शिखर धवन गेल्या काही महिन्यात कौटुंबिक कलहामुळे अनेकदा चर्चेत येत आहे.
आता त्याने नुकतीच सोशल मीडियावर एक भावनिक पोस्ट केली आहे. ही पोस्ट त्याने त्याचा मुलगा झोरावरसाठी केली आहे.
शिखरने केलेल्या पोस्टमध्ये दिसते की पंजाब किंग्सच्या जर्सीवर त्याचा मुलगा झोरावरचे नाव लिहिलेले असून ती जर्सी त्याने परिधान केली आहे. तसेच या जर्सीवर 1 क्रमांकही लिहिलेला आहे.
या पोस्टला त्याने कॅप्शन दिले आहे की, 'तू नेहमीच माझ्या बरोबर असशील, माझ्या मुला.'
लक्षात घेण्यासारखी गोष्ट अशी की शिखर अनेक महिन्यांपासून त्याच्या मुलाला भेटलेला किंवा बोललेलाही नाही.
कारण त्याचा त्याची पत्नी आयेशा मुखर्जीबरोबर 2021 मध्ये घटस्फोट झाला असून झोरावर आयेशाबरोबर ऑस्ट्रेलियामध्ये राहतो. तसेच शिखरने आरोप केला होता की ती त्याला झोरावरशी संपर्क ठेवू देत नाही.
धवन सध्या आयपीएल 2024 मध्ये पंजाब किंग्स संघाचा कर्णधार आहे. परंतु, त्याला काही दिवस सामन्यांना मुकावे लागणार आहे, कारण त्याला खांद्याची दुखापत झालेली आहे.