Monika Shinde
आजच्या डिजिटल युगात ईअरबड्स हा अनेकांच्या दैनंदिन जीवनाचा भाग बनला आहे.
संगीत ऐकणे, कॉल्सवर बोलणे, व्हिडिओ बघणे यासाठी सतत ईअरबड्स वापरण्यात येतात. मात्र याचे दीर्घकालीन वापरामुळे काही गंभीर आरोग्यविषयक त्रास उद्भवू शकतात.
सतत मोठ्या आवाजात संगीत ऐकल्याने कानातील संवेदनशील पेशींवर ताण येतो. यामुळे हळूहळू ऐकू येण्याची ताकद कमी होते आणि कधी-कधी कायमस्वरूपी बहिरेपणाही येऊ शकतो.
ईअरबड्स वापरताना जर स्वच्छता पाळली गेली नाही, तर कानात घाम आणि आर्द्रता साठते. त्यामुळे बॅक्टेरिया व बुरशी वाढतात आणि त्यामुळे खाज, जळजळ, किंवा पूयुक्त संसर्ग होऊ शकतो.
ईअरबड्स कानाच्या आत खूप खोल घातल्यास, कानातील नैसर्गिक मळ बाहेर पडण्याऐवजी आतच साठतो. त्यामुळे कान भरल्यासारखा वाटतो आणि स्पष्ट ऐकू येण्यात अडथळा निर्माण होतो.
ईअरबड्स लावल्यामुळे बाहेरील ध्वनी कमी होतो, जे काही वेळेस धोकादायक ठरू शकते. विशेषतः रस्त्यावर चालताना किंवा वाहन चालवताना. अपघात होण्याचा धोका वाढतो.
कानांवर सतत आवाजाचा दाब पडल्यामुळे मेंदूवरही परिणाम होतो. त्यामुळे डोकेदुखी, थकवा किंवा चक्कर येणे यांसारखी लक्षणं दिसू शकतात.
काही लोकांना ईअरबड्स बनवण्यासाठी वापरण्यात आलेल्या साहित्यापासून (जसे सिलिकॉन किंवा प्लास्टिक) अ‍ॅलर्जी होते. यामुळे कानाच्या भोवती खाज, सूज किंवा रॅशेस होऊ शकतात.
ईअरबड्स सतत लावल्याने आपण अनेकदा इतरांशी संवाद साधण्याचे टाळतो. यामुळे सामाजिक संवादात अडथळा निर्माण होतो आणि मानसिकदृष्ट्या एकटेपणा जाणवतो.