प्रणाली कोद्रे
फिफा विश्वचषक 2026 आणि आशिया कप 2027 साठीच्या क्वालिफायर्सच्या दुसऱ्या फेरीत 26 मार्च 2024 रोजी गुवाहाटीत भारत आणि अफगाणिस्तान यांच्यात सामना झाला.
भारताचा फुटबॉल स्टार सुनील छेत्रीसाठी हा त्याचा आंतरराष्ट्रीय कारकिर्दीतील 150 वा सामना होता. मात्र त्याला या सामन्यात विजयी भेट मिळाली नाही.
दरम्यान, छेत्रीचा या सामन्याआधी खास सन्मानही करण्यात आला.
छेत्रीने या सामन्यात 38 व्या मिनिटाला पेनल्टीवर गोलही साकारला. मात्र अफगाणिस्तानकडून सामन्याच्या अखेरीस 2 गोल झाल्याने भारताने हा सामना गमावला.
दरम्यान, संघाने सामना गमावला असला, तरी छेत्रीसाठी वैयक्तिकरित्या हा सामना स्पेशल होता. त्याने गेलेला गोल आंतरराष्ट्रीय फुटबॉलमधील ९४ वा गोल ठरला.
आंतरराष्ट्रीय फुटबॉलमध्ये सर्वाधिक गोल करणाऱ्या सक्रिय खेळाडूंमध्ये छेत्री तिसऱ्या क्रमांकावर आहे. पहिल्या क्रमांकावर ख्रिस्तियानो रोनाल्डो आणि लिओनल मेस्सी आहे.
छेत्रीने 12 जून 2005 रोजी पाकिस्तानविरुद्धच्या सामन्यातून भारताच्या राष्ट्रीय संघासाठी पदार्पण केले होते.
39 वर्षीय छेत्रीने पदार्पणात गोल केला होता. इतकेच नाही तर त्याने आंतरराष्ट्रीय कारकिर्दीत 25 व्या, 50 व्या, 75व्या, 100 व्या, 125व्या आणि आता 150व्या सामन्यातही किमान एक गोल तरी केला आहे.