प्रणाली कोद्रे
भारताचा माजी कर्णधार एमएस धोनीसाठी 5 एप्रिल ही तारीख खूप खास आहे.
धोनीने 19 वर्षांपूर्वी म्हणजेच 5 एप्रिल 2005 रोजी आंतरराष्ट्रीय कारकिर्दीतील पहिले शतक झळकावले होते.
त्याने 5 एप्रिल 2005 रोजी विशाखापट्टणमला सौरव गांगुलीच्या नेतृत्वातील भारतीय संघाकडून पाकिस्तानविरुद्ध खेळताना हे शतक ठोकले होते.
धोनीचा हा त्याच्या कारकिर्दीतील पाचवा वनडे सामना होता. या सामन्यात तो तिसऱ्या क्रमांकावर फलंदाजीला आला होता.
धोनीने फलंदाजीला आल्यानंतर पाकिस्तानच्या गोलंदाजांची धुलाई करत तुफानी फटकेबाजी केली. त्याने 123 चेंडूत 15 चौकार आणि 4 षटकारांची बरसात करत 148 धावा ठोकल्या होत्या.
त्याच्या या खेळीनंतर तो प्रकाशझोतात तर आलाच, पण त्याचे नाव घराघरात पोहचले.
धोनीने केलेल्या त्या खेळीमुळे त्या सामन्यात भारताने 50 षटकात 9 बाद 356 धावा केल्या होत्या. त्यानंतर पाकिस्तानने 357 धावांच्या लक्ष्याचा पाठलाग करताना 44.1 षटकात सर्वबाद 298 धावा केल्या होत्या. त्यामुळे भारताने हा सामना 58 धावांनी जिंकला होता.