'बाप्पाच्या कानात काय सांगितलं भूषणने?'

अभिनेता भूषण प्रधानच्या घरची बाप्पाची मूर्ती त्याची आई स्वतः बनवते. पुण्यातील घरात गणपती घडवला जातो तर मुंबईच्या घरात त्याची स्थापना होते.

भूषणच्या घरी सर्व आप्तेष्टांच्या उपस्थितीत यंदा गणेशाचं आगमन आणि स्थापना झाली.

भूषणही गणेशोत्सवात शूटिंग मधून ब्रेक घेत बाप्पाच्या सेवेत मग्न होऊन जातो.

लहानपणापासून बाप्पा आपल्या घरी यावेत असा भूषणचा हट्ट होता. पण आईची अट होती, 'स्वतःचं घर घे आणि मग बाप्पांना आण'.

भूषणने गणेश चतुर्थीच्या दिवशीच आठ वर्षापूर्वी स्वतःचं घर घेतलं आणि पुढील वर्षी बाप्पांची स्थापना करुन आपला हट्टही पूर्ण केला. यावेळी त्यानं मोदकांवर आडवा हात मारल्याचं तो म्हणाला.

भूषण म्हणतो,''मी बाप्पांची मनोभावे पूजा करतो. मंदिरातही जातो. पण तरिही मी बाप्पाकडे काही मागत नाही. कारण मला माहित आहे,तो नेहमी सर्वांनाच न मागता सगळं देतो''.

भूषणच्या गणपतीचं विसर्जन हे घरातच केलं जातं. घरातील पिंपालाच विहिरीचा लूक देऊन भूषण आणि त्याचं कुटुंब पारंपरिक पद्धतीनं घरातच बाप्पाला निरोप देतात.