कोण आहेत बाबा बोखनाग? उत्तरकाशी बोगद्याबाहेर केली जातीय पूजा

उत्तराखंडच्या सिल्क्यारा बोगद्यात अडकलेले ४१ मजूर काल १७ दिवसांनंतर बोगद्यातून बाहेर आले.

मजुरांना बाहेर काढण्यासाठी प्रयत्न करणाऱ्या सर्वांचे मजूरांच्या घरातील लोक आणि इतर नागरीक आभार मानत आहेत.

त्यासोबतच ते बाबा बोखनाग यांच्याबद्दल कृतज्ञताही व्यक्त करत आहेत. लोकांचा असा विश्वास आहे की, बाबा बोखनाग यांनी इतके दिवस बोगद्यातील कामगारांचे संरक्षण केले आणि त्यांच्या कृपेनेच कामगार बाहेर येणार आहेत.

सिल्क्यारा बोगद्यात अडकलेल्या सर्व मजूरांना वाचवण्यासाठी सुरू असलेल्या बचावकार्यात अडथळे येत असतांना उत्तरकाशीतील लोकांनी याला दैवी कोप म्हटले.

बाबा बोखनाग यांच्यामुळे ही दुर्घटना घडली आणि त्यांच्या कृपेनेच कामगार बाहेर पडतील असे सांगितले.

मदत कार्य आणि विश्वास

स्थानिक लोकांमध्ये बाबा बोखनागचा उल्लेख मदत पथकापर्यंत पोहोचला. हा बोगदा बांधण्यासाठी बाबा बोखनागचे मंदिर पाडण्यात आले असून, हे मंदिर जोपर्यंत बांधले जात नाही, तोपर्यंत कामगारांना बाहेर पडणे कठीण होईल, असा दावा लोक करत होते.

यानंतर बोगद्याच्या तोंडावर बाबा बोखनागच्या मंदिराची स्थापना करून त्यामध्ये पूजा सुरू झाली. मंगळवारी मदत पथक कामगारांपर्यंत पोहोचल्याची माहिती मिळाली.

त्याआधी मदतकार्याचे नेतृत्व करणारे आंतरराष्ट्रीय बोगदा तज्ज्ञ अर्नोल्ड डिक्सही येथे पूजा करताना दिसले. सीएम पुष्कर सिंह धामी यांनीही कामगारांच्या सुरक्षित बचावाचे श्रेय बाबा बोखनाग यांच्या आशीर्वादाला दिले होते.

बाबा बोखनाग हे पर्वतांचे रक्षक

बाबा बौखनाग हे पर्वतांचे रक्षणकर्ते आहेत असे म्हणतात, उत्तरकाशीच्या राडी शीर्षस्थानी बोखनाग देवतेचे मंदिर देखील आहे, बाबा बौखनाग हे पर्वतांचे रक्षण करतात अशी स्थानिक लोकांची श्रद्धा आहे.

या परिसरात राहणाऱ्या लोकांमध्ये एक आख्यायिका आहे. बाबा बोखनाग ज्या पर्वतांचे रक्षण करतात ते पर्वत या रूपात प्रकट झाले आहेत, येथे दरवर्षी जत्रा भरते, असे मानले जाते की बाबा बोखनाग पर्वतावर राहणाऱ्या लोकांच्या प्रत्येक इच्छा पूर्ण करतात.

आता उत्तरकाशीच्या सिल्क्यरा बोगद्याच्या तोंडावर स्थापित बाबा बोखनागच्या मंदिरात दररोज पूजा केली जात आहे. असा दावाही केला जात आहे की, बोगदा बांधणाऱ्या टीमने इथली परंपरा पाळली नाही.

खरे तर असे म्हटले जाते की, उत्तरकाशीमध्ये जेव्हा जेव्हा बोगदा बांधला जातो तेव्हा त्याच्या तोंडावर प्रथम बाबा बोखनागचे मंदिर बांधले जाते.

स्थानिक लोकांच्या दाव्यावर विश्वास ठेवल्यानंतरच या टीमने येथे मंदिराची स्थापना केली.

नवयुग कंपनीचे प्रकल्प व्यवस्थापक राजेश्वर पवार यांनी स्वत: भाटिया गावात बाबा बौखनाग देवतांच्या दरबारात पोहोचून सर्व मजुरांना बाहेर काढण्यासाठी बाबांचा आशीर्वाद घेतला.