Pune News : राज्यातील आयटीआयचे विद्यार्थी धावणार ‘रन फॉर स्किल’ स्पर्धेत

पुणे - राज्यातील औद्योगिक प्रशिक्षण संस्थांमध्ये (आयटीआय) शिकणारे लाखो विद्यार्थी आता ‘कौशल्य प्रशिक्षणाचे महत्त्व’ याबाबत जागृती करण्यासाठी धावणार आहेत. होय, व्यवसाय शिक्षण व प्रशिक्षण संचालनालयाने राज्यभरातील आयटीआयमध्ये शिकत असलेल्या विद्यार्थ्यांसाठी येत्या रविवारी (ता.१७) ‘रन फॉर स्किल’ या मॅरेथॉन स्पर्धेचे आयोजन केले आहे.

राज्याचे कौशल्य, रोजगार, उद्योजकता आणि नाविन्यता मंत्री मंगल प्रभात लोढा यांच्या अध्यक्षतेखाली १९ जुलै २०२३ रोजी बैठक झाली. बैठकीत युवकांमध्ये कौशल्य प्रशिक्षणाचे महत्त्व वृद्धिंगत करण्यासाठी संपूर्ण राज्यात ‘रन फॉर स्किल’ संकल्पनेवर आधारित मॅरेथॉन स्पर्धा आयोजित करण्याचे आदेश देण्यात आले.

त्यानुसार व्यवसाय शिक्षण व प्रशिक्षण संचालनालय आणि महाराष्ट्र राज्य कौशल्य, व्यवसाय शिक्षण व प्रशिक्षण मंडळातर्फे येत्या रविवारी(ता.१७) ‘रन फॉर स्किल’ ही मॅरेथॉन स्पर्धा आयोजित केली आहे.

व्यवसाय आणि कौशल्य अभ्यासक्रमांची जागृती व्हावी, या उद्देशाने रविवारी सकाळी सात ते आठ या वेळेत ही मॅरेथॉन स्पर्धा आयोजित केली आहे. राज्यातील सर्व शासकीय आयटीआयच्या वतीने ही स्पर्धा आयोजित केली जाणार आहे. औद्योगिक प्रशिक्षण संस्थेतून अथवा नजीकच्या ऐतिहासिक किंवा प्रसिद्ध ठिकाणापासून स्पर्धेची सुरवात करून पाच किलोमीटरपर्यंत स्पर्धा आयोजित केली आहे.

स्पर्धेमध्ये संस्थेतील सर्व मुले-मुली प्रशिक्षणार्थी भाग घेणार आहेत. तसेच स्पर्धेतील पहिल्या तीन विजेत्यांना अनुक्रमे तीन हजार रुपये, दोन हजार रुपये आणि एक हजार रुपये यांसह सन्मानचिन्ह आणि प्रमाणपत्र देऊन सन्मानित करण्यात येणार आहे, अशी माहिती व्यवसाय शिक्षण व प्रशिक्षण संचालनालयाने दिली आहे.