ठाणे पालिकेचे पाणी बिल वसुलीकडे दुर्लक्ष; कोपरीतील सोसायटीला पाठविले साडेएकोणीस लाखाचे बिल 

ठाणे: ठाणे महापालिका आयुक्तांनी महसूल वाढविण्यासाठी मालमत्ता कर आणि पाणी बिलाच्या वसुलीचे उद्दिष्ट ठेवल्यानंतरही बिलाच्या वसुलीकडे दुर्लक्ष केल्याचा प्रकार समोर आला आहे. थकबाकीचा डोंगर उभा करून आता ऐन लॉकडाऊन काळात ठाणे पूर्वेकडील एका सोसायटीला लाखोंचे बील पाठवल्याने रहिवासी हादरले आहेत. तब्बल साडे 19 लाखांचे पाणी बील आल्याने कोपरीतील श्रमदान सोसायटीतील रहिवाशांनी व्यक्तीगत बिले देण्याची मागणी केली आहे. 

   कहानी घर घर की फेम अभिनेता समीर शर्माची आत्महत्या, टीव्ही इंडस्ट्रीला पुन्हा मोठा धक्का

कोपरी पूर्व परिसरात श्रमदान को. ऑप. हौ.सोसायटी ही 20 सदस्य असलेली सोसायटी आहे. ठाणे महापालिका पाणीपुरवठा विभागाने या सोसायटीला 2020-21 चे पाणी बिल थकबाकीसह 19 लाख 48 हजार इतके पाठवल्याने रहिवासी हादरले आहेत. गेले काही महिने लॉकडाऊन असल्याने हाताला काम नाही. अशा परिस्थितीत इतक्या मोठ्या रकमेचे बील कसे भरावे ? या विवंचनेत रहिवासी आहेत. अशा लाखो रुपयांच्या पाणी थकबाकीमुळे महापालिकेची दफ्तर दिरंगाईदेखील समोर आली आहे. 

यासंदर्भात, पालिकेचे जलअभियंता अर्जुन अहिरे, कार्यकारी अभियंता विनोद पवार आणि कोपरीच्या सहाय्यक आयुक्त प्रणाली घोंगे यांना संपर्क साधला मात्र, कुणीही प्रतिसाद दिला नाही.

मोठी बातमी : 5 ऑगस्टपासून सुरू झालेले मॉल 6 ऑगस्टपासून बंद, महापालिका आयुक्तांचा निर्णय

व्यक्तीगत बिलांची मागणी
सोसायटीतील काही रहिवासी पाणी बिल भरण्यास टाळाटाळ करीत असतानाही सोसायटीनेही तब्बल 20 वर्ष चालढकल केली. सोसायटीच्या काही सदस्यांनी ठाणे महापालिका आयुक्त यांच्याकडे अनेकवेळा लेखी स्वरुपात निवेदन देऊन पाणी बिल प्रत्येक सदस्यांना त्यांच्या नावावर व्यक्तिगत देण्यात यावे, अशी मागणी केली आहे. मात्र याकडे पालिकेने दुर्लक्ष केल्याचा आरोप रहिवाशांनी केला आहे.

------------------------------------

संपादन - तुषार सोनवणे