पालिका मुख्यालयाची सुरक्षा वाऱ्यावर

पालिका मुख्यालयाची सुरक्षा वाऱ्यावर
३० सीसीटीव्ही बंद असल्याची प्रशासनाची कबुली

सकाळ वृत्तसेवा
​मुंबई, ता. २ : महापालिकेच्या ऐतिहासिक मुख्यालय इमारतीच्या सुरक्षेबाबत एक धक्कादायक बाब समोर आली आहे. पालिकेच्या मुख्य इमारतीमधील तब्बल ३० सीसीटीव्ही कॅमेरे बंद अवस्थेत असल्याची कबुली खुद्द पालिका प्रशासनाने दिली आहे. या सुरक्षेतील गंभीर त्रुटींवरून स्थायी समितीत सर्वपक्षीय लोकप्रतिनिधींनी प्रशासनाला चांगलेच धारेवर धरले; मात्र विरोधकांचे सर्व आक्षेप डावलून ८७ नव्या ‘एआय’ आधारित अत्याधुनिक सीसीटीव्ही कॅमेऱ्यांचा सुमारे ३.४५ कोटी रुपयांचा प्रस्ताव अखेर मंजूर करण्यात आला.
महापालिका मुख्यालयात दररोज हजारो नागरिक आणि व्हीआयपींची ये-जा असते. शिवसेना (ठाकरे गट) नगरसेविका मीनाक्षी पाटणकर यांनी प्रशासनाच्या या ढिसाळ कारभारावर जोरदार हल्लाबोल केला. मुख्यालयातील कॅमेरे बंद असताना इतके दिवस प्रशासन काय करीत होते, हा सुरक्षेशी खेळ असून प्रशासनाने सुरक्षेकडे पूर्णपणे दुर्लक्ष केले आहे, असा थेट आरोप त्यांनी केला.
भाजपचे तेजिंदर तिवाना यांनी या निविदेतील कॅमेऱ्यांच्या दरांवर मोठे प्रश्नचिन्ह निर्माण केले. जुन्या कॅमेऱ्यांच्या तुलनेत यंदा निविदेत तब्बल चार पट अधिक दर लावण्यात आल्याचा आरोप त्यांनी केला. १५ हजारांचा कॅमेरा ४० हजारांत आणि एक लाखाचा कॅमेरा २.५० लाखांना दाखवला गेला आहे. हे दर अत्यंत अवास्तव असून यातील आर्थिक गणितांची चौकशी झाली पाहिजे, अशी मागणी त्यांनी लावून धरली. ​सुरक्षेचा मुद्दा केवळ कॅमेरे बसवण्यापुरता मर्यादित नसून डेटा स्टोरेज महत्त्वाचा असल्याचे लोकप्रतिनिधींनी निदर्शनास आणून दिले. अतिरिक्त आयुक्त बिपिन शर्मा यांनी पालिका मुख्यालयात एकूण ५६ कॅमेरे असून त्यातील ३० कॅमेरे सध्या कार्यरत नसल्याची कबुली दिली. निविदेतील अवास्तव दर आणि स्टोरेज क्षमतेवरून विरोधकांनी घेतलेले सर्व आक्षेप बाजूला ठेवत, स्थायी समिती अध्यक्ष प्रभाकर शिंदे यांनी या प्रस्तावाला मंजुरी दिली.
​........
नव्या सीसीटीव्हीविषयी
​एकूण नवे कॅमेरे : ८७
​कंत्राटदार : मेसर्स सहोरा कॉर्पोरेशन
​कालावधी : ९ महिने (काम पूर्ण करणे)
परिसर : महापौर, आयुक्त कार्यालय, सभागृह, स्थायी समिती दालन, प्रवेशद्वार आणि कॉरिडोर