विरारमध्ये कचऱ्यात सापडले नवजात अर्भक

नालासोपारा, ता. २८ (बातमीदार) : विरारच्या कोपरी तलावाच्या बाजूला सोमवारी (ता. २७) सायंकाळी नवजात मृत अर्भक सापडल्याने खळबळ उडाली आहे. घटनेची माहिती मिळताच विरार पोलिसांनी स्थानिकांच्या मदतीने अर्भक ताब्यात घेऊन शवविच्छेदनासाठी रुग्णालयात पाठवले. विरार पोलिसांनी याप्रकरणी गुन्हा दाखल केला आहे. सोमवारी सायंकाळी सातच्या सुमारास विरारच्या गासकोपरी तलावाशेजारी क्रिकेट खेळणाऱ्या मुलांना कचऱ्याच्या बाजूला नवजात अर्भक दिसले होते. खेळणाऱ्या मुलांनी याची माहिती स्थानिक नागरिकांमार्फत पोलिसांना दिल्यावर पोलिसांनी पंचनामा करून अर्भक ताब्यात घेतले. तलावाच्या शेजारी मोठी वस्ती आहे. याच वस्तीतील एखाद्या मातेने अर्भक फेकून दिले असावे, असा प्राथमिक अंदाज पोलिसांनी वर्तवला आहे.