पंतप्रधान मोदींच्या सभेला एक लाख जण उपस्थित राहतील!

पंतप्रधान मोदींच्या सभेला एक लाख जण उपस्थित राहतील!

कल्याण, ता. १२ (बातमीदार) : पंतप्रधान नरेंद्र मोदी यांच्या १५ मे रोजी कल्याणमध्ये होणाऱ्या भव्य सभेला एक लाख नागरिक उपस्थित राहतील, अशी माहिती महायुतीचे उमेदवार कपिल पाटील यांनी आज येथे पत्रकार परिषदेत दिली.
भिवंडी, कल्याण आणि ठाणे लोकसभा मतदारसंघासाठी होणाऱ्या या निवडणुकीतून तिन्ही मतदारसंघांत मोदीमय वातावरण निर्माण होईल, असेही त्यांनी नमूद केले. पंतप्रधान नरेंद्र मोदी यांच्याकडून आधारवाडी येथील छत्रपती शिवाजी महाराज मैदानावर १५ मे रोजी दुपारी अडीच वाजता मार्गदर्शन केले जाणार आहे. या मैदानाबरोबरच व्यासपीठ व अन्य सुविधांची कपिल पाटील यांनी पाहणी केली. त्यानंतर ते पत्रकार परिषदेत बोलत होते. लोकसभा निवडणुकीच्या प्रचारात सातत्याने महायुतीला जनतेचे समर्थन मिळत आहे. त्यामुळे मोदी यांची होणारी सभा विक्रमी होईल. तसेच भिवंडी, कल्याण आणि ठाणे लोकसभा मतदारसंघातील निवडणुकीत महायुतीच्या तिन्ही उमेदवारांचा विजय होईल, असे पाटील यांनी सांगितले. मोदी यांच्या संकल्पनेतून देशाचा विकास होत असून, त्यांना सलग तिसऱ्यांदा पंतप्रधान करण्यासाठी जनतेने भरघोस मतदान करावे. सध्या उन्हाची तीव्रता असली तरी देशासाठी मतदान करण्यासाठी एक दिवस द्यावा, तसेच पंतप्रधान नरेंद्र मोदी यांच्या विकासात योगदान द्यावे, असे आवाहन कपिल पाटील यांनी केले. या पत्रकार परिषदेला भाजपचे जिल्हाध्यक्ष नाना सूर्यवंशी, शहराध्यक्ष वरुण पाटील, प्रेमनाथ म्हात्रे आदींची उपस्थिती होती.