कोपरखैरणेत भरदिवसा ३० लाखांची घरफोडी

नवी मुंबई, ता. १० (वार्ताहर) : कोपरखैरणेतील बोनकोडे भागात राहणाऱ्या एका सोनाराचे घर अज्ञात चोरांनी भरदिवसा फोडून त्यांच्या घरातील पाच लाखांच्या रोख रकमेसह वेगवेगळ्या प्रकारचे सोन्याचे दागिने असा तब्बल ३० लाखांचा ऐवज चोरून नेल्याची घटना ७ एप्रिलला उघडकीस आली आहे. कोपरखैरणे पोलिसांनी अज्ञात चोराविरोधात गुन्हा दाखल केला आहे.
तक्रारदार मांगिलाल कुमावत (५१) हे सोनार असून, ते कोपरखैरणेतील बोनकोडे येथील गोकुळधाम अपार्टमेंटमध्ये कुटुंबासह राहण्यास आहेत. मांगिलाल यांच्या आईची तब्येत खराब असल्याने ते काही दिवसांपूर्वी आपल्या मूळगावी राजस्थान येथे गेले होते. त्यामुळे त्यांचा मुलगा आणि मुलगी हे दोघेच घरी हेते. ७ एप्रिलला दुपारी अडीच वाजण्याच्या सुमारास त्यांचा मुलगा व मुलगी हे दोघेही कामानिमित्त बाहेर गेले होते. यादरम्यान, मांगिलाल यांचे घर बंद असल्याने चोरांनी संधी साधून त्यांच्या दरवाजाचे कुलूप तोडून घरात प्रवेश केला. मांगिलाल यांच्या घरातील कपाटात पाच लाख रुपयांची रोख रक्कम, तसेच ६०४.८१० ग्रॅम वजनाचे सोन्याचे दागिने असा तब्बल २९ लाख ८० हजार रुपये किमतीचा ऐवज चोरून नेला. काही वेळानंतर मांगिलाल यांचा मुलगा व मुलगी हे दोघेही रात्री सव्वाआठ वाजता घरी परतल्यानंतर चोरी झाल्याचे निदर्शनास आले. त्यानंतर या घटनेची माहिती त्यांनी वडील मांगिलाल यांना दिल्यानंतर बुधवारी त्यांनी राजस्थान येथून नवी मुंबई गाठून पोलिस ठाण्यात तक्रार दाखल केली.