सामाजिक बांधिलकी जपत आमदार गावित यांचा वाढदिवस

कासा, ता. २४ (बातमीदार) : शासनकर्त्यांनी केवळ सोहळे न करता प्रत्यक्ष जनतेमध्ये जावे, हे उदाहरण ठरवत आमदार राजेंद्र गावित यांनी आपल्या वाढदिवसानिमित्त कासा उपजिल्हा रुग्णालयाला भेट देत रुग्णांची विचारपूस केली. रुग्णांना फळे आणि बिस्किटांचे वाटप करून सामाजिक बांधिलकीचा आदर्श त्यांनी निर्माण केला. या भेटीत त्यांनी रुग्णालयात दाखल अनेक दुर्गम भागातील रुग्णांशी संवाद साधत त्यांच्या समस्या जाणून घेतल्या आणि त्यांना अल्पोहारही दिला. या वेळी त्यांनी रुग्णालयातील सेवासुविधांची माहिती घेण्यासाठी डॉक्टर व परिचारिकांशीही चर्चा केली.

वैद्यकीय अधीक्षक डॉ. सचिन वाघमारे यांनी आमदार गावित यांना सध्या सुरू असलेल्या पावसाळी आजारांबाबत माहिती दिली. विशेषतः सर्पदंश, विंचूदंश, तसेच ग्रामीण भागातील गरोदर महिलांची प्रसूतीसाठी मोठ्या प्रमाणात नोंदणी होत असल्याचे त्यांनी सांगितले. रुग्णालय भेटीनंतर आमदार गावित यांनी महालक्ष्मी मंदिरात दर्शन घेऊन वाढदिवसानिमित्त भंडाऱ्याचे आयोजन केले, मात्र त्यांनी कोणतेही मोठे समारंभ टाळत सामाजिक उपक्रमांना प्राधान्य दिले. याप्रसंगी शिवसेना डहाणू तालुकाप्रमुख संतोष देशमुख, राजकुमार गिरी, तसेच मोठ्या संख्येने कार्यकर्ते व स्थानिक नागरिक उपस्थित होते.