खड्डे विरोधात डॉक्टर आक्रमक

डॉक्टरांचे थेट खड्ड्यात बसून आंदोलन
घाटकोपर, ता. २९ (बातमीदार) ः मुंबईच्या उपनगरातील विक्रोळी कन्नमवार नगर भागात रस्त्यांना मोठे खड्डे पडल्याने नागरिकांना नाहक त्रासाला सामोरे जावे लागत आहे. याविरोधात आता थेट डॉक्टर योगेश भालेराव यांनी मंगळवारी (ता. २९) खड्ड्यात बसून आंदोलन छेडले आहे.
विक्रोळी पूर्वेतील कन्नमवार भागातील रस्त्यांना अनेक खड्डे पडले असल्याने पालिका तात्पुरत्या स्वरूपात डांबर टाकून व्यवस्था करण्याचा प्रयत्न करते, मात्र मागील काही दिवसांपासून सतत पडणाऱ्या पावसात डांबरदेखील वाहून गेलेले दिसते. रस्त्यावर खड्डे पडल्याने येथील वाहतूकदेखील मंदावली आहे. या खड्ड्यांविरोधात योगेश भालेराव यांनी आंदोलन करत प्रशासनाला इशारा दिला, तर खड्ड्यात पाणी साचून राहात असल्याने मच्छरदेखील वाढून परिसरात डेंगी, मलेरिया पसरण्याचा धोका संभवत असल्याचे योगेश भालेराव यांनी सांगितले.

फोटो : विक्रोळी येथील खड्ड्यांविरोधात डॉ. योगेश भालेराव आंदोलन करताना. छायाचित्र : नीलेश मोरे