कोकण युवा प्रतिष्ठानतर्फे कोकणरत्नांचा सन्मान

कोकण युवा प्रतिष्ठानतर्फे कोकणरत्नांचा सन्मान
सकाळ वृत्तसेवा
डोंबिवली, ता. २९ ः कोकणच्या समृद्धीसाठी कोकण भूमी प्रतिष्ठानच्या माध्यमातून अनेक वर्षांपासून कार्यरत असलेले संजय यादवराव यांना कोकण युवा प्रतिष्ठानच्या वतीने कोकणभूषण पुरस्कार प्रदान करून रविवारी (ता. २७) गौरविण्यात आले. या वेळी साहित्य अकादमी युवा पुरस्कार विजेते प्रदीप कोकरे (कोकण साहित्यरत्न), ज्येष्ठ पत्रकार शैलेंद्र शिर्के (कोकणरत्न पत्रकारिता) व अन्य मान्यवरांना कोकणरत्न पुरस्काराने सन्मानित करण्यात आले.
डोंबिवली येथील मराठा मंदिर संस्थेच्या सभागृहात झालेल्या कार्यक्रमात कोकणातील सामाजिक चळवळींचा आधारस्तंभ आणि राजापूर लांजा तालुका नागरिक संघाचे अध्यक्ष सुभाष लाड, शिव प्रतिष्ठानचे अध्यक्ष सुहास चव्हाण यांच्या हस्ते हे पुरस्कार वितरित करण्यात आले. या वेळी उद्योजक सुनील नारकर, मंदार हळबे, राहुल कामत, मराठा मंडळाचे पदाधिकारी आदी मान्यवर उपस्थित होते.

पुरस्कारांनी सन्मानित
दिग्दर्शक, लेखक राजेश देशपांडे (कला), रोहित शर्माचे प्रशिक्षक दिनेश लाड (क्रीडा), अजय आयरे (उद्योग), संदीप परटवलकर (शिक्षण), पोलिस सेवेतील मनीष शिंदे (शौर्य), काजूची नवी जात विकसित करणाऱे अमर खामकर (कृषी), श्रध्दा कळंबटे (सामाजिक) यांना ही कोकणरत्न पुरस्कारांनी सन्मानित करण्यात आले.

विशेष सत्कार
विविध क्षेत्रात काम करणाऱ्या गुणवंतांचा गौरव करण्यात आला. सी. ए. परीक्षेत देशात तिसरा आलेल्या शार्दुल विचारे याचा विशेष सत्कार करण्यात आला, तर माजी विश्वस्त श्रीराम चाळके यांचाही सन्मान करण्यात आला.