मंडळांच्या मंडपात आज- उद्या गणरायांचा आगमन सोहळा जल्लोषात

मुंबईत आज-उद्या गणरायांच्या आगमन सोहळ्याची धूम
सकाळ वृत्तसेवा
मुंबई, ता. १ ः गणेशोत्सवाची मुंबईत लगबग सुरू झाली आहे. शनिवारी (ता. २) आणि रविवारी (ता. ३) सार्वजनिक गणेशोत्सव मंडळांच्या मंडपात गणपती बाप्पाचे आगमन जल्लोषात होणार आहे. शनिवारी खैरानीचा राजा, मिरा-भाईंदरचा महाराजा, मुंबईचा युवराज, राजा बदाम गल्लीचा तर, रविवारी काळाचौकीचा महागणपती, खेतवाडीचा राजा, फोर्टचा राजा, परळचा मोरया, कुर्ल्याचा महाराजा आदी बाप्पांचे मंडपात आगमन होणार आहे.
गणेशोत्सवाला येत्या २७ ऑगस्टपासून मोठ्या धुमधडाक्यात सुरुवात होणार आहे. त्याआधी १५ दिवस आधीपासून मोठ्या मंडळांच्या मंडपात गणपती बाप्पाचे आगमन जल्लोषात होते. या आगमन सोहळ्यासाठी मुंबई तसेच आजूबाजूच्या शहरातील भाविकांची अलोट गर्दी बघण्यास मिळते. लालबाग, चिंचपोकळी ते कॉटनग्रीनपर्यंतचे रस्ते फुलून जातात. शनिवारी व रविवारीही गणपती आगमन सोहळा होणार असल्याने बहुतांश सार्वजनिक मंडळे सज्ज झाली आहेत.

मुंबापुरी गजबजणार
आगमन सोहळ्यासाठी सकाळपासूनच मुंबईभरातून गणेशभक्त येण्यास सुरुवात होते. आगमन मिरवणूक निघते तेव्हा मोठी गर्दी होते. मुंबईतील लालबाग, चिंचपोकळी हा भाग गणेशभक्तांसाठी पंढरी मानला जातो. दरवर्षी याठिकाणी लाखो भाविक आपल्या लाडक्या बाप्पाचे दर्शन घेण्यासाठी पोहोचत असतो. आगमनाच्या मिरवणुकीला विशेषतः तरुणाईची मोठी गर्दी होते. गर्दी लक्षात घेऊन मंडळांकडून आरोग्यसेवाही उपलब्ध केली जाते. काही स्थानिक सोसायट्यांकडून भाविकांसाठी मोफत अल्पोहाराचीही व्यवस्था केली जाते. दुपारपासून सुरू होणारा आगमन सोहळा संध्याकाळपर्यंत सुरू राहतो. गणेशोत्सवाआधी शनिवारी, रविवारी आगमन सोहळे सुरू राहतात.