कारागृहातील बंदीकरिता रोजगाराभिमुख व्यावसायिक प्रशिक्षण

कारागृहातील बंदींकरिता रोजगाराभिमुख व्यावसायिक प्रशिक्षण
अलिबाग जिल्हा कारागृहात इलेक्ट्रॉनिक्स वस्तू रिपेअरिंगचे धडे; ३५ बंद्यांचा उत्स्फूर्त सहभाग
अलिबाग, ता. १ (वार्ताहर) : कारागृहातून शिक्षा पूर्ण करून बाहेर पडणाऱ्या बंद्यांनी पुन्हा गुन्हेगारी क्षेत्राकडे वळू नये, तर समाजात सन्मानाने नवे जीवन जगावे, यासाठी कारागृह प्रशासनाने महत्त्वपूर्ण पाऊल उचलले आहे. बंद्यांना रोजगारसंधी उपलब्ध करून देत त्यांच्या कुटुंबीयांचा उदरनिर्वाह सुरळीत व्हावा, हा उद्देश ठेवून अपर पोलिस महासंचालक व महानिरीक्षक, कारागृह व सुधारसेवा, पुणे व विषेश कारागृह महानिरीक्षक, मुंबई यांच्या मार्गदर्शनाखाली व्यावसायिक प्रशिक्षणावर भर दिला जात आहे.
या उपक्रमाचा एक भाग म्हणून अलिबाग जिल्हा कारागृहात रुरल डेव्हलपमेंट प्रोग्राम ट्रस्ट यांच्या माध्यमातून इलेक्ट्रॉनिक्स वस्तू रिपेअरिंग प्रशिक्षण सुरू करण्यात आले आहे. या कार्यक्रमाचे उद्घाटन जिल्हा विधी सेवा प्राधिकरणाच्या सचिव तेजस्विनी निराळे यांच्या हस्ते झाले. प्रशिक्षणात एसी, फ्रिज, वॉशिंग मशीन, टीव्ही, मिक्सर, ग्राईंडर, गिझर यांसारख्या दैनंदिन जीवनातील महत्त्वाच्या इलेक्ट्रॉनिक्स वस्तू दुरुस्तीचे कौशल्य शिकवले जाणार आहे. या प्रशिक्षणात कारागृहातील तब्बल ३५ बंद्यांनी उत्स्फूर्त सहभाग नोंदविला आहे. तेजस्विनी निराळे यांनी उपस्थितांना मार्गदर्शन करताना सांगितले की, कारागृहातून सुटून गेलेल्या व्यक्तीने समाजात पुन्हा आपले स्थान निर्माण करणे ही मोठी प्रक्रिया आहे. या प्रशिक्षणाच्या माध्यमातून त्यांना रोजगाराच्या संधी निर्माण होतील आणि ते आत्मनिर्भर होतील. म्हणूनच प्रत्येक बंद्याने या संधीचा लाभ घ्यावा. या कार्यक्रमाला प्रभारी अधीक्षक विशाल बांदल, तृप्ती वटकर, प्रशिक्षक येवले, श्री श्री रुरल डेव्हलपमेंट प्रोग्राम ट्रस्टचे प्रतिनिधी, ॲड. चंद्रशेखर कामथे, मुख्य लोकअभिरक्षक ॲड. निलोफर शेख, सहाय्यक लोकअभिरक्षक ॲड. पीयूष गाडे, तसेच जिल्हा विधी सेवा प्राधिकरणाच्या लिपिक नितल म्हात्रे यांसह इतर मान्यवर उपस्थित होते.