पालिका शाळेतील मूलभूत सुविधांचा अभाव उघड; तातडीने कारवाईचे निर्देश

पालिका शाळेतील मूलभूत सुविधांचा अभाव
नगरसेवक ममित चौगुले यांच्याकडून पाहणी; तातडीने कारवाईचे निर्देश
तुर्भे, ता. १ (बातमीदार) ः ऐरोलीतील दिवा गाव येथील नवी मुंबई महापालिकेच्या शाळेत मूलभूत सुविधांचा गंभीर अभाव असल्याचे उघड झाले आहे. या पार्श्वभूमीवर ममित चौगुले यांनी प्रत्यक्ष पाहणी केली असता संताप व्यक्त केला आहे. तसेच, प्रशासनाला तातडीने कारवाईचे निर्देश त्यांनी दिले.
पालिकेच्या शाळेत विद्यार्थी वापरातील शौचालयाच्या छतामधून पाणी गळत असून, स्वच्छतेचा अभाव असल्याचे आढळले. तसेच, पिण्याच्या पाण्याचा फिल्टर खराब अवस्थेत असून, त्यातूनही गळती होत असल्यामुळे परिसरात पाणी साचल्याचे निदर्शनास आले. याची ममित चौगुले यांनी पाहणी करत विद्यार्थी आणि शिक्षकांशी संवाद साधून त्यांच्या अडचणी जाणून घेतल्या. या समस्यांमुळे विद्यार्थ्यांच्या आरोग्य व शिक्षणावर विपरीत परिणाम होत असल्याची बाब त्यांनी गंभीरतेने मांडली. या प्रकरणाची तात्काळ दखल घेत चौगुले यांनी संबंधित अधिकाऱ्यांशी संपर्क साधून दुरुस्ती व सुधारणा कामे तातडीने सुरू करण्याच्या सूचना दिल्या. तसेच, या कामांचा वैयक्तिक पातळीवर पाठपुरावा करण्यात येणार असल्याचेही त्यांनी स्पष्ट केले.
शिक्षण हा प्रत्येक मुलाचा मूलभूत हक्क आहे. विद्यार्थ्यांना सुरक्षित, स्वच्छ आणि सुसज्ज वातावरण देणे ही प्रशासनाची जबाबदारी आहे, असे सांगत विद्यार्थ्यांच्या भविष्यासोबत कोणतीही तडजोड होऊ दिली जाणार नाही, अशी भूमिका त्यांनी यावेळी व्यक्त केली.