माथेरानमध्ये सेमी इंग्रजी शिक्षणाची नवी दिशा

माथेरानमध्ये सेमी इंग्रजी शिक्षणाची नवी दिशा
वीर कोतवाल शाळेत पहिलीपासून वर्ग सुरू होणार
कर्जत, ता. ३ (बातमीदार) ः माथेरान नगर परिषदेच्या वीर कोतवाल शाळेत सेमी इंग्रजी वर्ग सुरू करण्याचा महत्त्वपूर्ण निर्णय घेण्यात आला. गुरुवारी (ता. ३) झालेल्या शिक्षक-पालक सभेत हा निर्णय घेतला. यामुळे मराठी माध्यमात शिकणाऱ्या विद्यार्थ्यांना इंग्रजी विषयाचे दर्जेदार ज्ञान मिळवण्याचा नवा पर्याय उपलब्ध झाला आहे.
समिती सदस्य प्रतिभा घावरे यांनी विद्यार्थ्यांच्या अभ्यासाची माहिती पालकांनी वेळोवेळी घेत राहावी आणि मुलांमधील गुणवत्तेला योग्य संधी द्यावी, असे सांगितले. इंग्रजी माध्यमाबाबत वाढत्या आकर्षणामुळे मराठी शाळांमध्ये विद्यार्थ्यांची संख्या कमी होत असल्याची बाब लक्षात घेता, सेमी इंग्रजी हा उत्तम पर्याय ठरू शकतो, असा विश्वास शिक्षण सभापती सुनील शिंदे यांनी व्यक्त केला. यासाठी प्रशिक्षित शिक्षकांची नेमणूक केली जाणार असून, पहिलीपासूनच सेमी इंग्रजी वर्ग सुरू करण्यात येणार आहेत.
या सभेला शिक्षण सभापती सुनील शिंदे, समिती सदस्य प्रतिभा घावरे, केतन रामाने आणि सुरेखा साळुंखे उपस्थित होते. मुख्याध्यापक दिलीप अहिरे यांनी शाळेच्या प्रगतीचा आढावा घेतला. शिक्षक सचिन भोईर यांनी पालकांना मुलांना मोबाईलपासून दूर ठेवण्याचे आवाहन केले. तसेच शिक्षक लक्ष्मण ढेबे, साक्षी कदम, अमोल अंधारे आणि मनीषा चौधरी यांनी विद्यार्थ्यांच्या वक्तशीरपणाबाबत पालकांनी जागरूक राहण्याची गरज व्यक्त केली.

शाळेचा चेहरामोहरा बदलणार
मुख्याधिकारी राहुल इंगळे यांच्या मार्गदर्शनाखाली शाळेत आधुनिक सुविधा उपलब्ध करून देण्यात आल्या आहेत. प्रत्येक वर्गात स्मार्ट डिजिटल बोर्ड, विविध शैक्षणिक साधने आणि स्वच्छ स्वच्छतागृहे यामुळे शाळेचा चेहरामोहरा बदलला आहे. मुख्याध्यापक दिलीप अहिरे यांनी पालकांना आपल्या मुलांचा प्रवेश मराठी माध्यमाच्या शाळेत घेण्याचे आवाहन केले.