क्रीडांगण : युरोपीय मैदानावर स्पेनचा दबदबा

किशोर पेटकरफुटबॉलची अफाट गुणवत्ता असलेल्या स्पेनने २००८ ते २०१२ या कालावधीत सुवर्णयुग अनुभवले. विश्वकरंडक पटकावण्याचे स्पेनचे स्वप्न २०१० साली साकार झाले. २०१२ साली स्पेनने युरो करंडकात बाजी मारली. दशकभराचा कालावधी निराशेत गेल्यानंतर आता लुईस दे ला फ्युएन्टे यांच्या मार्गदर्शनाखाली स्पॅनिश फुटबॉल गतवैभवाच्या दिशेने कूच करताना दिसत आहे..स्पेनच्या युवा दमाच्या फुटबॉल संघाने चौथ्यांदा युरो करंडक फुटबॉल स्पर्धा जिंकली. युरोपीय फुटबॉल मैदानावर दबदबा राखताना जर्मनीत झालेल्या स्पर्धेत ओळीने सात विजय नोंदविण्याचा विक्रमही त्यांनी केला. ला रोहा या टोपणनावाने ओळखल्या जाणाऱ्या स्पेन फुटबॉल संघाने बर्लिनमधील अंतिम लढतीत इंग्लंडला २-१ फरकाने नमविले. सर्वाधिक चार वेळा युरो करंडक जिंकणारा स्पेन पहिला संघ ठरला आहे. इंग्लिश फुटबॉल संघ तसा कमनशिबीच मानायला हवा. सलग दुसऱ्यांदा त्यांनी अंतिम फेरी गाठली, पण गॅरेथ साऊथगेट यांच्या मार्गदर्शनाखालील इंग्लंडला पुन्हा उपविजेतेपदावरच समाधान मानावे लागले. दुसरीकडे, ६३ वर्षीय लुईस दे ला फ्युएन्टे यांनी दोन वर्षांतच हरहुन्नरी आणि युवा रक्ताच्या भक्कम अष्टपैलू संघाची बांधणी केली. २०२२मध्ये फ्युएन्टे यांनी लुईस एन्रिके यांच्याकडून मुख्य प्रशिक्षकपदाची सूत्रे हाती घेतली. गतवर्षी जूनमध्ये स्पेनने क्रोएशियाला अंतिम लढतीत पेनल्टी शूटआऊटमध्ये हरवून युरोपियन (यूईएफए) नेशन्स लीग स्पर्धा जिंकली होती, आता वर्षभरात प्रतिष्ठेच्या युरो करंडकावर नाव कोरले. युरो करंडक सर्वाधिक चार वेळा जिंकणारा स्पेन पहिला संघ ठरला आहे.गतवैभव प्राप्त करण्याच्या दिशेनेस्पॅनिश फुटबॉलच्या इतिहासावर नजर टाकता, फुटबॉलची अफाट गुणवत्ता असलेल्या या देशाने २००८ ते २०१२ या कालावधीत सुवर्णयुग अनुभवले. १९६४ साली त्यांनी सर्वप्रथम युरोपियन नेशन्स कप (आता युरो करंडक) पटकावला. त्यानंतर चार दशके विजेतेपदाच्या दृष्टीने स्पॅनिश फुटबॉलसाठी दुष्काळाची ठरली. २००४ साली लुईस अरागोनेस यांची स्पेन फुटबॉल संघाचे मुख्य प्रशिक्षक म्हणून नेमणूक झाली..त्यांच्या मार्गदर्शनाखाली स्पेनने २००८ साली युरो करंडक दुसऱ्यांदा पटकावला. व्हिसेंट डेल बॉस्के यांच्या मार्गदर्शनाखाली स्पॅनिश फुटबॉलने अत्युच्च शिखर गाठले. विश्वकरंडक पटकावण्याचे स्पेनचे स्वप्न २०१० साली साकार झाले. बॉस्के यांच्याच मार्गदर्शनाखाली २०१२ साली स्पेनने युरो करंडकात बाजी मारली. दशकभराचा कालावधी निराशेत गेल्यानंतर आता फ्युएन्टे यांच्या मार्गदर्शनाखाली स्पॅनिश फुटबॉल गतवैभवाच्या दिशेने कूच करताना दिसत आहे.किमयागार लमिन यमालयुरो करंडक विजेत्या स्पेन संघात युवा फुटबॉलपटूंची फौज किमयागार ठरली. स्पेनच्या लमिन यमाल याने १७ वर्षे व एक दिवसाचा असताना प्रमुख स्पर्धेची (युरो अथवा विश्वकरंडक) अंतिम लढत खेळणारा सर्वांत युवा फुटबॉलपटू होण्याचा पराक्रम केला. त्याने महान फुटबॉलपटू पेले यांना मागे टाकले. सर्वांत कमी वयात प्रमुख स्पर्धेत गोल नोंदविणारा यमाल युरो करंडकातील सर्वोत्तम युवा फुटबॉलपटू ठरला.यमालचे वडील मुनीर नासरावी हे मोरोक्कन, तर आई शीला एबाना या इक्वेटोरियल गिनी देशातील. पोटापाण्यासाठी स्थलांतरित झालेल्या यमालच्या पालकांनी स्पेनला कर्मभूमी मानले आणि त्यांचे अपत्य आता स्पॅनिश फुटबॉलसाठी मौल्यवान रत्न ठरले आहे. यमालचा स्पेन संघातील सहकारी निको (निकोलस) विल्यम्स हासुद्धा मुळचा स्पॅनिश नाही.त्याचा भाऊ इनाकी विल्यम्स घाना देशाकडून खेळतो. आई-वडील दोघेही घाना देशातील. काही वर्षांपूर्वी निर्वासित विल्यम्स कुटुंबाला स्पेनने आसरा दिला. त्याचा फायदा आता दिसत आहे. अंतिम लढतीत स्पेनसाठी महत्त्वपूर्ण गोल नोंदविणारा निको सामन्याचा मानकरी ठरला.(किशोर पेटकर सकाळ माध्यम समूहाच्या दै. गोमन्तकचे क्रीडा वार्ताहर आहेत.)------------------------------.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.